Milliyet: ԺԴԿ-ին կառաջարկվի Սպորտի, Անտառային տնտեսության և ԵՄ հարցերով նախարարների պաշտոնները

Քաղաքական13:59, 24 Օգոստոս 2015

Milliyet: ԺԴԿ-ին կառաջարկվի Սպորտի, Անտառային տնտեսության և ԵՄ հարցերով նախարարների պաշտոնները

Թուրքիայում ձևավորվելիք ժամանակավոր կառավարությունում ըստ մեջլիսում ունեցած պատգամավորական մանդատների քանակի` 3 նախարարական պորտֆել էլ բաժին է ընկնում քրդական «Ժողովուրդների դեմոկրատական կուսակցությանը» (HDP-ԺԴԿ): Թուրքական «Milliyet» թերթի կայքի տեղեկություններով` ժամանակավոր կառավարությունում, որը գործելու է մինչև նոյեմբերի 1-ին նախանշված վաղաժամ խորհրդարանական ընտրությունները, ԺԴԿ-ին առաջարկվելու է Սպորտի ու երիտասարդության, Եվրամիության հարցերով և Անտառային ու ջրային տնտեսության նախարարությունները:

Աղբյուրը նշում է, որ անցումային կառավարությունում 3 պորտֆելները բաժին են ընկնում անկախ քաղաքական գործիչների, իսկ մնացած 23-ը, (ներառյալ վարչապետի պաշտոնը) ըստ մեջլիսում ունեցած տեղերի, պետք է բաշխվեին հետևյալ կերպ, «Արդարություն և զարգացում կուսակցություն» (ԱԶԿ-AKP)- 11, Ժողովրդահանրապետական կուսակցություն (CHP-ԺՀԿ)-6, «Ազգայնական շարժում կուսակցություն» (ԱՇԿ-MHP)-3, «Ժողովուրդների դեմոկրատական կուսակցություն»-3 մանդատ:

Սակայն ԺՀԿ և ԱՇԿ-ն հրաժարվել են անցումային կառավարության մաս կազմել, ինչից հետո վարչապետ Ահմեթ Դավութօղլուն հայտարարել է, որ նախարարական պորտֆելները զբաղեցնելու առաջարկներ կուղարկվեն այդ երկու կուսակցություններից կոնկրետ գործիչների` շրջանցելով կուսակցության ղեկավարությանը: Իսկ եթե ԺՀԿ-ական ու ԱՇԿ-ական առանձին գործիչները չընդունեն Դավութօղլուի առաջարկները, ապա մնում է այդ կուսակցություններին հասանելիք ընդհանուր թվով 9 պորտֆելներում նշանակել անկախ գործիչների:

Աղբյուր` Ermenihaber.am