ԻՊ-ը Թուրքիայից ակտիվորեն զինյալներ է հավաքագրում

Տարածաշրջան11:32, 25 Օգոստոս 2015

ԻՊ-ը Թուրքիայից ակտիվորեն զինյալներ է հավաքագրում

Թուրքիայի Արդարադատության նախարարության տվյալների համաձայն՝ ներկայումս Թուրքիայում «Իսլամական պետությանը» (ԻՊ -İŞİD) անդամակցության մեղադրանքով ձերբակալված 126 կասկածյալ կա: Ըստ BBC-ի թուրքական ծառայության՝ 2015թ. հուլիս ամսվա դրությամբ ԻՊ-ին անդամակցելու նպատակով Թուրքիայից մեկնածների, վերադարձածների և մահացածների ընդհանուր թիվը հասնում է 1000- 1300-ի:

Թուրք հասարակության մեջ քննարկման հսկա ալիք է առաջացրել այն հանգամանքը, որ Սիրիայում և Իրաքում մեծ արագությամբ տարածվող ԻՊ-ը Թուրքիայից զինյալներ է հավաքագրում: Իսկ թուրքական ընդդիմադիր քաղաքական ուժերը մեղադրել են իշխանությանը՝ երկրում հետզհետե հաստատվող ու ամրապնդվող ԻՊ-ի վրա աչք փակելու համար:

Ընդդիմադիր «Ժողովրդահանրապետական կուսակցության» (ԺՀԿ - CHP) մի խումբ պատգամավորներ մեկնել են Ադըյաման, որտեղ ԻՊ-ը հատկապես ակտիվորեն զինյալներ է հավաքագրում: ԺՀԿ պատգամավորների՝ թեմայի վերաբերյալ կազմած և օգոստոսի սկզբին հրապարակած հաշվետությունում նշվում է, որ այն ընտանիքները, որոնց երեխաները ենթադրաբար անդամակցել են ԻՊ-ին, դիմել են Թուրքիայի անվտանգության վարչություն, սակայն նրանց բողոք –հայցերը անուշադրության են մատնվել:

Աղբյուր` Ermenihaber.am