Թուրքիայի նորանշանակ արտգործնախարարը կմեկնի Բաքու

Քաղաքական10:13, 14 Սեպտեմբեր 2015

Թուրքիայի նորանշանակ արտգործնախարարը կմեկնի Բաքու

Թուրքիայի ժամանակավոր կառավարության նորանշանակ արտաքին գործերի նախարար Ֆերիդուն Սինիրօղլին հունիսի 15-18 ընկած ժամանակահատվածում պաշտոնական այցով մեկնելու է Ադրբեջան: Այդ պաշտոնում սա նրա 2-րդ արտասահմանյան այցն է: Առաջինը կատարել էր սեպտեմբերի 7-ին հյուսիսային Կիպրոսի ինքնահռչակ թուրքական հանրապետություն:

Թուրքական «kamugundemi»-ի իրազեկմամբ` Սինիրօղլուն այցի ընթացքում հանդիպելու է Ադրբեջանի նախագահ Իլհամ Ալիևի, արտաքին գործերի նախարար Էլմար Մամմեդիարովի, ինչպես նաև վարչապետ Արթուր Ռասիզադեի հետ:

Նշվում է, որ վերոնշյալ հանդիպումների ժամանակ բացի երկկողմ հարաբերություններից, քննարկվելու է նաև Լեռնային Ղարաբաղի հակամարտության խնդիրը, Սիրիայում և Իրաքում ստեղծված ճգնաժամային իրավիճակը, ինչպես նաև փախստականների հարցը:

Նշենք, որ Սինիրօղլուն, սեպտեմբերի 11-ին պաշտոնական այցով մեկնելով Ղազախստան և մասնակցելով Թյուրքախոս եկրների համագործակցության խորհրդի 5-րդ գագաթնաժողովին, կրկին խոսել էր Ադրբեջանի տարածքային ամբողջականության և Լեռնային Ղարաբաղի հիմնախնդրի մասին՝ առաջ քաշելով թուրք-ադրբեջանական պաշտոնական թեզերը:

Աղբյուր` Ermenihaber.am