Թուրքիայի գլխավոր ընդդիմադիր կուսակցությունում թեկնածուական ճգնաժամ է հասունանում

Քաղաքական08:45, 15 Սեպտեմբեր 2015

Թուրքիայի գլխավոր ընդդիմադիր կուսակցությունում թեկնածուական ճգնաժամ է հասունանում

Թուրքիայի ընդդիմադիր քեմալական «Ժողովրդահանրապետական կուսակցության» (ԺՀԿ – CHP) ներսում լարվածություն է նկատվում: Թուրքական «Haberler.com» լրատվակայքի համաձայն՝ ԺՀԿ-ում շշուկներ են տարածվել, թե կուսակցության ղեկավար Քեմալ Քըլըչդարօղլուն նոյեմբերի 1-ին կայանալիք պատգամավորական ընտրությունների թեկնածուների ցուցակից դուրս է թողնելու որոշ անձանց, որոնք ընտրվել էին նախորդ՝ հունիսի 7-ի ընտրություններում:

Այդ անձանց թվում առավել ուշագրավ է հատկապես ԺՀԿ-ի Անթալիայի պատգամավոր Դենիզ Բայքալը, նույն ինքը՝ ԺՀԿ-ի նախկին կուսակցապետը, ով հրաժարվեց նախագահությունից սեքս-սկանդալի մեջ ընկնելու պատճառով:

Ըստ աղբյուրի՝ ԺՀԿ-ի նախագահի պաշտոնը Քըլըչդարօղլուին հանձնած Բայքալը շարունակում է իրեն կուսակցության նախագահի պես պահել, ինչը որոշակի լարվածություն է առաջացնում: Նշվում է, որ հունիսի 7-ի ընտրություններից հետո նախահագ Ռեջեփ Թայիփ Էրդողանի հետ հանդիպելու պատճառով Բայքալը կուսակցության ներսում լուրջ քննադատության էր արժանացել, իսկ Քըլըչդարօղլուի հետ հարաբերությունները վատացել էին:

Կարծիք կա նաև, որ նոյեմբերի 1-ի ընտրացուցակներում տեղ չի գտնելու Յալովայից պատգամավորի ԺՀԿ-ական թեկնածու Մուհարրեմ Ինջեն, ով հունիսի 7-ի ընտրություններից հետո քննադատել էր ԺՀԿ-ին ու հայտարարել, որ իր կուսակցությունը անհաջողության է մատնվել:

Աղբյուր` Ermenihaber.am