Դավութօղլու-Ռոհանի հանդիպմանը Թուրքիայի դրոշի բացակայությունը` դժգոհության առիթ

Քաղաքական08:56, 30 Սեպտեմբեր 2015

Դավութօղլու-Ռոհանի հանդիպմանը Թուրքիայի դրոշի բացակայությունը` դժգոհության առիթ

Թուրքիայի վարչապետ Ահմեթ Դավութօղլուի և Իրանի նախագահ Հասան Ռոհանիի՝ Նյու Յորքում տեղի ունեցած հանդիպման ժամանակ սեղանին միայն Իրանի դրոշն է եղել: Դա դժգոհություն է առաջացրել ընդդիմադիր «Ժողովրդահանրապետական» (ԺՀԿ-CHP) և «Ազգայնական շարժում» (ԱՇԿ-MHP) կուսակցությունների շրջանում: ԺՀԿ-ական պատգամավոր Էրեն Ահմեթ Դավութօղլուին ուղղված գրավոր հարցում է ներկայացրել մեջլիս:

Ըստ թուրքական «Alfahaber.com» լրատվական կայքի` Դավութօղլուին ուղղված գրավոր հարցման մեջ պատգամավորը հետաքրքրվել , թե ինչու է հանդիպման ժամանակ սեղանից բացակայել Թուրքիայի դրոշն այն դեպքում, երբ առկա է եղել Իրանի պետական դրոշը: Պատգամավորը հետաքրքրվել է նաև, թե ինչու՞ այդ իրավիճակը տարակուսանք չի առաջացրել Թուրքիայի վարչապետի մոտ:

«Մեր դրոշը միայն ընտրությունների ժամանա՞կ է Ձեր մտքին գալիս: Ձեր կուսակցությունն ու կուսակցության որոշ հիմնադիր անդամներ միայն զոհերի դագաղների վրա փռելով ձայներ հավաքելու համա՞ր են օգտագործում»,- ասված է հարցման մեջ:

ԱՇԿ-ի խորհրդարանական խմբակցության փոխնախագահ Օքթայ Վուրալն էլ «Twitter»-ի միկրոբլոգում կատարած գրառման մեջ հարց է ուղղել Դավութօղլուին, թե պետական դրոշի բացակայության պայմաններում տեղի ունեցած հանդիպման ժամանակ ու՞մ էր ներկայացնում վարչապետը:

Աղբյուր` Ermenihaber.am