Ողբերգական վթար Անկարայում

12:40, 02 Հոկտեմբեր 2015

Ողբերգական վթար Անկարայում

Թուրքիայի մայրաքաղաք Անկարայի փողոցներից մեկում քաղաքապետարանին պատկանող ավտոբուսը բախվել է փողոցի կանգառասրահներից մեկին, որի հետևանքով 12 մարդ է զոհվել, իսկ 13 հոգի ստացել են տարբեր աստիճանի մարմնական վնասվածքներ:

Թուրքական «mynet» լրատվական կայքի հաղորդմամբ` վթարի հետևանքով կողաշրջված ավտոբուսի տակ են մնացել 7-8 մարդ:

Անկարայի նահանգապետը լրագրողների հետ հանդիպմանը տեղեկացրել է, որ ավտոբուսի վարորդը վթարի պահին առողջական ոչ մի խնդիր չի ունեցել: Վարորդը արդեն ցուցմունք է տվել և պատճառաբանել, որ ուղղակի ավտոբուսը դուրս է եկել վերահսկողությունից: Մինչդեռ լրատվամիջոցներում շրջանառվում է վարկած, որ ողբերգական վթարի պատճառը եղել է արգելակների անսարքությունը:

Թուրքական աղբյուրը նշում է, որ դեպքի վայր ժամանած ոստիկանները ստիպված են եղել արցունքաբեր գազ կիրառել ամբոխի դեմ, որպեսզի ցրեն նրանց և կարողանան համապատասխան աշխատանքներն ավելի արդյունավետ կատարել:

Աղբյուր` Ermenihaber.am