Դավութօղլու. «Սիրիայի հարցը թուրք-ռուսական ճգնաժամ չէ»

Քաղաքական13:56, 05 Հոկտեմբեր 2015

Դավութօղլու. «Սիրիայի հարցը թուրք-ռուսական ճգնաժամ չէ»

Թուրքիայի վարչապետ, իշխող «Արդարություն և զարգացում» կուսակցության (ԱԶԿ-AKP) նախագահ Ահմեթ Դավութօղլուն ռուսական ռազմական ինքնաթիռի կողմից Թուրքիայի սահմանը հատելու հետ կապված հայտարարության է արել:

«CnnTürk» լրատվական ծառայության տեղեկացմամբ՝ Դավութօղլուն ասել է, որ Թուրքիայի պարտավորությունների կանոնները կիրառելի են յուրաքանչյուր երկրի՝ թե Սիրիայի, թե Ռուսաստանի, թե մեկ այլ երկրի ինքնաթիռների նկատմամբ:

«Թուրքիայի Զինված Ուժերը հստակ լիազորություն են ստացել. Թուրքիայի Հանրապետության սահմանները խախտողների նկատմամբ, եթե անգամ դա թռչուն անգամ լինի, կիրականացվի անհրաժեշտ միջամտություն»,- ընդգծել է Թուրքիայի վարչապետը:

Վարչապետը տեղեկացրել է, որ սահմանի խախտման առնչությամբ ակտիվ դիվանագիտական շփումներ են սկսվել: «Արտգործնախարարին անհրաժեշտ կարգադրություններ ենք տվել: Մեր դիրքորոշումը շատ պարզ է՝ ով մեր սահմանները խախտի, բարեկամաբար կզգուշացնենք: Սա վերաբերում է յուրաքանչյուր երկրին, իսկ Ռուսաստանը մեր հարևանը, մեր բարեկամն է: Այս իմաստով Թուրքիայի և Ռուսաստանի միջև որևէ լարվածություն չի եղել: Սիրիայի հարցը թուրք-ռուսական ճգնաժամ չէ»,- շեշտել է Դավութօղլուն:

Հիշեցնենք, որ Թուրքիայի արգործնախարարությունը հայտարարել էր, որ հոկտեմբերի 3-ին Ռուսաստանին պատկանող ռազմական ինքնաթիռը Հաթայ (նահանգ թուրք-սիրիայան սահմանին) նահանգի հարավային հատվածում խախտել էր Թուրքիայի սահմանը:

Աղբյուր` Ermenihaber.am