Էրդողան. «Եթե Ռուսաստանը կորցնի Թուրքիայի նման գործընկերոջ, ապա շատ բան կկորցնի»:

Քաղաքական12:29, 06 Հոկտեմբեր 2015

Էրդողան. «Եթե Ռուսաստանը կորցնի Թուրքիայի նման գործընկերոջ, ապա շատ բան կկորցնի»:

Թուրքիայի նախագահ Ռեջեփ Թայիփ Էրդողանը Բելգիայի վարչապետ Շարլ Միկելի հետ հանդիպման ժամանակ խոսել է Սիրիայում ռուսական ռազմական ինքնաթիռների կողմից Թուրքիայի օդային սահմանը խախտելու մասին:

Ըստ թուրքական «onedio» լրատվական կայքի` Էրդողանը, կրկին հանդես գալով Սիրիայի նախագահ Բաշար Ասադին քննադատելու դիրքերից, նշել է, որ վերջինիս վարչակազմն աջակցություն է ստանում այնպիսի երկրներից, ինչպիսիք են Ռուսաստանը և Իրանի Իսլամական Հանրապետությունը (ԻԻՀ):

Թուրքիայի նախագահը ընդգծել է, որ ցանկացած հարձակում Թուրքիայի վրա, դա նշանակում է հարձակում ՆԱՏՕ (Հյուսիսատլանտյան դաշինք) վրա:

«Ռուսաստանի հետ մեր ունեցած հարաբերությունները հայտնի են: Մեր միջև կա համագործակցություն: Բայց պետք է գիտակցել, որ եթե Ռուսաստանը կորցնի Թուրքիայի նման գործընկերոջ, ապա շատ բան կկորցնի»:

Էրդողանի համոզմամբ՝ Ռուսաստանը պաշտպանում է մեկին, որի վարչակազմի պատճառով 350 հազար մարդ է մահացել: Նա հիշեցրել է, որ ՆԱՏՕ-ն նույնպես կոշտ է արձագանքել ռուսական ռազմական ինքնաթիռների վերոնշյալ գործողություններին:

Նշենք, որ Թուրքիայի արտգործնախարարությունն օրեր առաջ հայտարարել է, որ Ռուսաստանին պատկանող ռազմական ինքնաթիռը երկրորդ անգամ Սիրիայում ռազմական գործողություններ իրականացնելիս խախտել Թուրիքիայի օդային սահմանը:

Աղբյուր` Ermenihaber.am