Դեմիրթաշը Թուրքիայի իշխանություններին. «Թե կարող եք, Պուտինի վրա էլ մատ թափ տվեք»

Քաղաքական12:46, 08 Հոկտեմբեր 2015

Դեմիրթաշը Թուրքիայի իշխանություններին. «Թե կարող եք, Պուտինի վրա էլ մատ թափ տվեք»

Թուրքիայի քրդամետ «Ժողովուրդների դեմոկրատական կուսակացության» համանախագահ Սելահեթթին Դեմիրթաշը Դիրաբեքիրում հանդիպել է լրագրողների հետ: Ռուսական ռազմական ինքնաթիռների՝ Թուրքիայի սահմանի խախտելու վերաբերյալ լրագրողներից մեկի հարցին ի պատասխան Դեմիրթաշն ասել է, որ այդ հարցն իրականում պետք է տալ «մեկ շաբաթ առաջ Մոսկվայում Վլադիմիր Պուտինի հետ մզկիթ բացողներին»՝ նկատի ունենալով մզկիթի բացման համար սեպտեմբերի 23-ին Մոսկվա այցելած Թուրքիայի նախագահ Ռեջեփ Թայիփ Էրդողանին:

«Մեկ շաբաթ առաջ այնտեղ ասում էիր (նկատի ունի Թուրքիայի նախագահ Ռեջեփ Թայիփ Էրդողանը-խմբ), թե ամեն ինչ բավականին լավ է: Տե՛ս, հիմա մեկ շաբաթվա ընթացքում Թուրքիայի օդային սահմանը 3 անգամ խախտել են: Մի բառ չլսվեց: Իսկ երբ հարցը մեզ է վերաբերում, գոռում-գոչում եք ու մեր վրա մատ թափ տալիս: Թե կարող եք, Պուտինի վրա էլ մատ թափ տվեք, տեսնենք»,- Դեմիթաշի խոսքերը փոխանցում է թուրքական «mynet» լրատվական կայքը:

Դեմիրթաշի կարծիքով՝ Սիրիայում մղվող պատերազմին Ռուսաստանի և Չինաստանի ներգրավման պատճառով պատերազմը ավելի լայնածավալ կդառնա:

Աղբյուր` Ermenihaber.am