Մեկնարկում է հանրապետական Թուրքիայի պատմության մեջ ամենամասշտաբային նախագիծը

Տնտեսական09:38, 19 Հոկտեմբեր 2015

Մեկնարկում է հանրապետական Թուրքիայի պատմության մեջ ամենամասշտաբային նախագիծը

Թուրքիայի նախագահ Ռեջեփ Թայիփ Էրդողանն ու վարչապետ Ահմեթ Դավութօղլուն մասնակցել են Ստամբուլի նոր օդանավակայանի կառուցման ֆինանսավորման մասին համաձայնագրի ստորագրման պաշտոնական արարողությանը:
Թուրքական «Milliyet» -ի տեղեկացմամբ՝ արարողության ժամանակ Էրդողանը ընդգծել է, որ այս նախագիծը հանրապետական Թուրքիայի պատմության մեջ ամենամեծն է իր մասշտաբով:

Օդանավակայանի նախագծի բյուջեն կազմում է 32 մլրդ 399 մլն եվրո և այս ոլորտում Թուրքիայի ամենամեծ ներդրումն է: Էրդողանը նշել է, որ «խելահեղ նախագծերի» թվին պատկանող այս ծրագիրը սկզբնական փուլում ֆինանսավորվելու է 6 թուրքական բանկերի կողմից:

Ստամբուլի 3-րդ օդանավակայանի կառուցումը ընդհանուր առմամբ 4 փուլով կընթանա: Էրդողանը նշել է, որ նախատեսված է նոր օդանավակայանի առաջին հատվածը շահագործման հանձնել 2018թ. առաջին քառորդում: Ենթադրվում է, որ սկզբնական շրջանում օդանավակայանի շնորհիվ 80.000 քաղաքացու լրացուցիչ աշխատանքի հնարավորություն կտրվի, իսկ օդանավակայանի ամբողջությամբ շահագործման հանձնելուց հետո՝ 120.000 քաղաքացի կապահովվի աշխատանքով:

Աղբյուր` Ermenihaber.am