Աբդուլլահ Գյուլի գրասենյակն արձագանքել է Դավութօղլուի քննադատությանը

Քաղաքական09:11, 20 Հոկտեմբեր 2015

Աբդուլլահ Գյուլի գրասենյակն արձագանքել է Դավութօղլուի քննադատությանը

Թուրքիայում առկա իրավիճակն իշխող «Արդարություն և զարգացում» կուսակցության (AKP-ԱԶԿ) նախկին և ներկա առաջնորդների միջև տարաձայնությունների պատճառ է դարձել: Անկարայում 102 մարդու կյանք խլած ահաբեկչական պայթյուններից հետո Թուրքիայի նախկին նախագահ, ԱԶԿ-ի հիմնադիրներից Աբդուլլահ Գյուլն ու ներկայիս վարչապետ, ԱԶԿ -ի նախագահ Ահմեթ Դավութօղլուն միմյանց քննադատող հայտարարություններով են հանդես եկել:

«CnnTürk» լրատական ծառայությունը հիշեցնում է, որ Անկարայի ահաբեկչությունից հետո Գյուլը, զանգահարելով քրդամետ «Ժողովուրդների դեմոկրատական կուսակցության» (ԺԴԿ-HDP) համանախագահ Սելահաթթին Դեմիրթաշին, ցավակցել էր կատարվածի համար:

Դավութօղլուն կոշտ էր արձագանքել նախկին նախագահի քայլին՝ ընդգծելով, որ ցավը բոլորինն է, և ցավակցությունների հասցեատերն էլ Թուրքիան է, իսկ ցավակցությունը պետք է հղվեր Թուրքիայի կառավարությանը:

«Պարոն նախագահի որոշելիքն էր իհարկե, բայց մի բան, այնուամենայնիվ, ուզում եմ ասել: Այստեղ ցավակցությունների հասցեատերը Թուրքիայի Հանրապետությունն է: Բոլորս ենք ցավ ապրել: Միայն ԺԴԿ-ին ցավակցություն հղելով՝ նշանակում է այնտեղ կյանքը կորցրած բոլոր քաղաքացիներին նույնացնել ԺԴԿ-ի հետ»,-ասել էր Դավութօղլուն:

Նախկին նախագահի գրասենյակն արձագանքել է վարչապետ Դավութօղլուի վերոնշյալ խոսքերին՝ հայտարարելով, որ նախկին նախագահ Գյուլը ցավակցել է ոչ միայն ԺԴԿ-ին, այլև «Ժողովրդահանրապետական կուսակցությանը», «Հանրային աշխատավորների արհմիությունների համադաշնությանը» և «Հեղափոխական աշխատողների արհմիությունների համադաշնութանը»:

«Աբդուլլահ Գյուլը, որպես Թուրքիայի 11-րդ նախագահ, իր ցավակցություն է հղել մեր ողջ ազգին»,- ասված է Գյուի գրասենյակի տարածած հայտարարության մեջ:

Աղբյուր` Ermenihaber.am