Թուրքիային սահմանակից սիրիական Թել Աբյադ քաղաքում քրդերն ինքնավարություն են հայտարարել

Տարածաշրջան08:20, 22 Հոկտեմբեր 2015

Թուրքիային սահմանակից սիրիական Թել Աբյադ քաղաքում քրդերն ինքնավարություն են հայտարարել

Թուրքիային սահմանակից սիրիական Թել Աբյադ քաղաքում, որը հունիսին ազատագրվել էր «Իսլամական պետություն» (ԻՊ) ահաբեկչական կազմակերպության զինյալներից, ժողովրդավարական ինքնավարություն է հայտարարվել: Քաղաքում տեղական ինքնակառավարում կազմակերպելու նպատակով տեղի արաբ, քուրդ թուրքմեն և հայ բնակչության ներկայացուցիչներից կազմված խորհրդարան է հիմնվել: Խորհրդարանն ունի 7 արաբ, 4 քուրդ, 2 թուրքմեն և 1 հայ ներկայացուցիչ:

Ըստ թուրքական «Hurriyet» թերթի կայքի` Թել Աբյադի ղեկավարությունը քաղաքականապես կենթարկվի Սիրիայի Քոբանի քրդական կանտոնին (վարչատարածքային միավորում-EH):

Նշվում է, որ ժողովրդավարական ինքնավարություն ստեղծելու պատրաստությունները սկսվել էին դեռևս քրդական «Ժողովրդավարական միություն կուսակցության» (ԺՄԿ-PYD) ռազմական թևի` «Ժողովրդի պաշտպանության ուժերի» (ԺՊՈՒ-YPG) և որոշ սիրիական ընդիմադիր խմբավորումների կողմից քաղաքն ԻՊ-ից ազատագրելուց հետո:

Նշենք, որ Թուրքիայի իշխանությունները Սիրիայի ամենաազդեցիկ քրդական քաղաքական ուժը հանդիսացող PYD-ի ռազմական թև YPG–ին բազմիցս մեղադրել են Թուրքիայում ահաբեկչական կազմակերպություն ճանաչված «Քուրդիստանի բանվորական կուսակցության» (PKK-ՔԲԿ) ազդեցության տակ լինելու մեջ:

Աղբյուր` Ermenihaber.am