Փերինչեք. «Թուրքիան ԱԶԿ-ի սուլթանության պարտքերն արյամբ է վճարում»

Քաղաքական10:05, 26 Հոկտեմբեր 2015

Փերինչեք. «Թուրքիան ԱԶԿ-ի սուլթանության պարտքերն արյամբ է վճարում»

Թուրքիայի «Vatan» կուսակցության նախագահ, Հայոց ցեղասպանությունը ժխտող Դողու Փերինչեքը Քոջաելի նահանգում հանդիպում է ունեցել իր ղեկավարած կուսակցության անդամների հետ և քննադատության ենթարկել կառավարող «Արդարություն և զարգացում կուսակցությանը» (ԱԶԿ-AKP):

Ըստ թուրքական «kocaeligazetesi.com.tr» կայքի` նահանգի Իզմիթ արդյունաբերական քաղաքում տեղի ունեցած հանդիպման ժամանակ Փերինչեքը, խոսելով երկրի արտաքին պարտքի մասին, ասել է. «Պարտքն ի՞նչով ենք վճարելու: Պարտքը ձեր արյունով եք վճարելու: Թուրքիան, ԱԶԿ-ի սուլթանության և դրանից առաջ Թուրգութ Օզալով սկսված շրջանի պարտքերն արյունով է վճարում»:

Վերջինս մեղադրել է մեջլիս անցած բոլոր 4 քաղաքական կուսակցություններին` հունիսի 7-ին ձևավորված խորհրդարանում որևէ որոշում կամ օրենք չընդունելու մեջ:

Փերինչեքն ավելացրել է նաև, որ այս խորհրդարանի կազմավորմամբ ահաբեկիչները հայտնվել են այդ բարձրագույն կառույցում:

Աղբյուր` Ermenihaber.am