Դավութօղլուն հայտնել է, որ 2 անգամ հարվածել են Սիրիայի հյուսիսի քրդական ազդեցիկ ուժերի դիրքերին

Քաղաքական08:49, 27 Հոկտեմբեր 2015

Դավութօղլուն հայտնել է, որ 2 անգամ հարվածել են Սիրիայի հյուսիսի քրդական ազդեցիկ ուժերի դիրքերին

Թուրքական «ATV» հեռուստաալիքին հյուրընկալված վարչապետ Ահմեթ Դավութօղլուն հայտարարել է, որ իրենց զինված ուժերը 2 անգամ հարվածել են Սիրիայի հյուսիսում ամենաազդեցիկ քաղաքական ուժը հանդիսացող քրդական «Ժողովրդավարական միություն կուսակցության» (ԺՄԿ-PYD) դիրքերին:

Ըստ թուրքական «Sondakika.com» լրատվական կայքի` Դավութօղլուն նշել է, որ իրենք PYD-ի ներկայացուցիչների և սիրիական իշխանությունների անցկացրած հանդիպման կապակցությամբ արդեն բարձրաձայնել են իրենց անհանգստությունը:

«Թուրքիան դեռևս չի բացել իր խաղաքարտերը: Երբ բացի, ամեն ինչ այլ կերպ կլինի: Արդյո՞ք կարող է Սիրիայի հարցը լուծվել առանց Թուրքիայի մասնակցության: Մենք և՛ ԱՄՆ-ին և՛ Ռուսաստանին ասացինք` «PYD-ը Եփրատի հյուսիս չի անցնելու» և 2 անգամ հարվածեցինք PYD-ին»,- նշել է Թուրքիայի վարչապետը:

Նշենք, որ Թուրքիայի իշխանությունները PYD-ին իր ռազմական թևի` YPG–ի հետ միասին բազմիցս մեղադրել են Թուրքիայում ահաբեկչական կազմակերպություն ճանաչված «Քուրդիստանի բանվորական կուսակցության» (PKK-ՔԲԿ) ազդեցության տակ լինելու մեջ: Թուրքական իշխանությունները հիվանդագին են արձագանքում Սիրիայի հյուսիսում քրդական քաղաքական հոսանքների գրանցած հաջողություններին, որոնք կարող են ճանապարհ բացել այդ հատվածում քրդական ինքնավարության համար: Թուրքիայի բարձրագույն քաղաքական ղեկավարները բազմիցս հայտարարել են, որ չեն պատրաստվում թույլ տալ Սիրիայի հյուսիսում` Թուրքիայի անմիջական հարևանությամբ, քրդական ինքնավարության ստեղծումը:

Աղբյուր` Ermenihaber.am