Էրդողանի խոսնակ. «Կառավարման համակարգի փոփոխման քննարկումներն առանց ժողովրդի մասնակցության չեն լինի»

Քաղաքական13:53, 04 Նոյեմբեր 2015

Էրդողանի խոսնակ. «Կառավարման համակարգի փոփոխման քննարկումներն առանց ժողովրդի մասնակցության չեն լինի»

Թուրքիայի նախագահ Ռեջեփ Թայիփ Էրդողանի մամուլի խոսնակ Իբրահիմ Քալընը մամուլի ասուլիսի ժամանակ անդրադարձել է մի շարք օրակարգային թեմաների և պատասխանել լրագրողների հարցերին: Ինչպես տեղեկացնում է թուրքական իշխանամետ «Sabah» լրատվական կայքը, Քալընը, պատասխանելով նախագահական կառավարման համակարգին անցնելու վերաբերյալ հարցին, ասել է, որ կառավարման համակարգի փոփոխման քննարկումներն առանց ժողովրդի մասնակցության չեն լինի:

«Նման կարևոր հարցի քննարկումը, երբ ժամանակ գա, առանց ժողովրդի մասնկացության, բնականաբար, հնարավոր չէ պատկերացնել: Եթե դրա իրականացման ճանապարհը հանրաքվեի անցկացումն է, ապա պետք է գնալ հանրաքվեի: Խորհրդարանում մի շարք օրենսդրական փոփոխություններ պետք արվեն: Բայց այս պահին ուզում եմ ընդգծել, որ սա այն հարցն է, որը պետք է կարգավորել մեր ժողովրդի հետ խորհրդակցելով, բանակցելով, նրա տեսակետը հաշվի առնելով»,-ասել է Քալընը:

Տեղեկացնենք, որ իշխող «Արդարություն և զարգացում» կուսակցությունը ցանկանում է Թուրքիայում սահմանադրական փոփոխություններ իրականացնել: Դրանց գլխավոր կետերից մեկը վերաբերում է երկրի կառավարման համակագի փոփոխմանը: Նախատեսվում է խորհրդարանական կառավարման համակարգից անցնել նախագահական համակարգի:

Աղբյուր` Ermenihaber.am