Թուրքական մամուլ. «Գյուլենականները 100 միլիոն դոլար են տվել Հիլարի Քլինթոնին»

Քաղաքական10:34, 06 Նոյեմբեր 2015

Թուրքական մամուլ. «Գյուլենականները 100 միլիոն դոլար են տվել Հիլարի Քլինթոնին»

Իսլամի հայտնի քարոզիչ, ամերիկաբնակ թուրք միլիարդատեր Ֆեթուլլահ Գյուլենի հիմնած շարժման հետևորդները 100 միլիոն դոլար նվիրատվություն են արել ԱՄՆ «Դեմոկրատական կուսակցության» թեկնածու Հիլարի Քլինթոնին՝ ԱՄՆ նախագահական ընտրարշավի համար: Այս մասին գրում է թուրքական «Haber7» լրատվական կայքը՝ նշելով, որ Թուրքիայի ֆինանսական հանցագործությունների հետաքննության խորհրդի (MASAK) տվյալներով՝ ԱՄՆ-ում գործում է գյուլենականներին պատկանող 166 հիմնադրամ և միություն: Նշվում է, որ գյուլենական շարժումը, ԱՄՆ-ում նախընտրական քարոզարշավների ժամանակ մեծ գումարներ նվիրաբերելով, փորձում է իր կողմը գրավել մեծ թվով քաղաքական գործիչների: Իսկ ԱՄՆ նախագահի ամենահավանական թեկնածու Հիլարի Քլինթոնի քարոզարշավի համար գումար փոխանցելով` գյուլենականները փորձում են ԱՄՆ-ի իշխանությունների միջոցով Թուրքիայում իրենց շարժման դեմ պետական քաղաքականությունը մեղմել և ազատվել դատական հետապնդումներից:

Նշվում է, որ շարժման հետևորդ Մուստաֆա Յեշիլի գլխավորությամբ ԱՄՆ-ը մեկնած պատվիրակություն, որի կազմում ընդգրկվել են նաև ԱՄՆ-ում գործող գյուլենականների հիմնադրամների և միությունների նախագահները, ԱՄՆ կոնգրեսում և սենատում, ՄԱԿ-ում, նահանգային կառույցներում հանդիպումների ժամանակ բողոքել է Թուրքիայի իշխանություններից:

Թուրքական կայքի պնդումների համաձայն՝ գյուլենականների կառույցները համագործակցում են հայկական և հրեական լոբբիստական կազմակերպությունների հետ ԱՄՆ-ում գործող թուրքական այլ կառույցներին հակադեմոկրատական ներկայացնելու համար:

Աղբյուր` Ermenihaber.am