Գորշ գայլերի քաղաքական թևը համարվող կուսակցությունում հետընտրական ճգնաժամ է

Քաղաքական06:56, 07 Նոյեմբեր 2015

Գորշ գայլերի քաղաքական թևը համարվող կուսակցությունում հետընտրական ճգնաժամ է

Նոյեմբերի 1-ին Թուրքիայում կայացած արտահերթ խորհրդարանական ընտրություններում ամենամեծ անհաջողությունը կրել էր «Գորշ գայլեր» ծայրահեղական խմբավորման քաղաքական թևը համարվող «Ազգայնական շարժում» կուսակցությունը (MHP-ԱՇԿ), որը հավաքել էր ընտրողների 11.6 տոկոսի ձայնները։ Նախորդ ընտրությունների համեմատ կուսակցությունը կորցնել էր ստացած քվեների մոտ 5 տոկոսը։

Այս անհաջողությունից հետո կուսակցության Իզմիրի նահանգային կառույցի նախագահի 6 տեղակալները և նահանգային խորհրդի 1 անդամ հրաժարականի դիմում են ներկայացրել։ Այս մասին տեղեկացնում է թուրքական «Milliyet» թերթը` կատարվածը բնութագրելով որպես «քաղաքական երկրաշարժ Իզմիրում»:

Նրանց համատեղ հայտարարության մեջ ասվում է, որ ժողովրդավարության կանոնի համաձայն անհաջողության մատնվողը իր տեղը պետք է զիջի։ «Կուսակցությունը մեր անձնական սեփականությունը չէ։ Մենք կորցրել ենք մարդկանց վստահությունը։ Այնպիսի միջավայրում, որտեղ մեր նկատմամբ կորել է հավատն ու վստահությունը, վայել է ոչ թե կառչել աթոռից, այլ այն թողնել ավելի արժանավորներին»,-նշված է հայտարարության մեջ։

Աղբյուր` Ermenihaber.am