Գերմանիայի կանցլերը հայտնել է, թե ԵՄ-ն որքան գումար է պատրաստվում տրամադրել Թուրքիային

Քաղաքական08:55, 13 Նոյեմբեր 2015

Գերմանիայի կանցլերը հայտնել է, թե ԵՄ-ն որքան գումար է պատրաստվում տրամադրել Թուրքիային

Եվրոպայում ներգաղթյալների առաջացրած ճգնաժամի թեմայով Մալթայի մայրաքաղաք Վալետայում հրավիրվել է գագաթնաժողով, որի շրջանակներում տեղի է ունեցել Եվրախորհրդի (ԵԽ) ոչ պաշտոնական նիստը: Այնուհետև տեղի է ունեցել մամուլի ասուլիս:

Թուրքական «Hürriyet» պարբերականի կայքի տեղեկացմամբ՝ մամուլի ասուլիսի ժամանակ Գերմանիայի կանցլեր Անգելա Մերկելը նշել է, որ ներգաղթյալների խնդրով առաջիկայում ևս մեկ գագաթնաժողով կգումարվի, որին կմասնակցեն Եվրամիությունը (ԵՄ) և Թուրքիան:

Մերկելը մասնավորապես տեղեկացրել է, որ նշյալ գագաթնաժողովը տեղի կունենա նոյեմբերի վերջին կամ դեկտեմբերի սկզբին: Ըստ Մերկելի՝ գագաթնաժողովի ընթացքում քննարկվելու են ԵՄ-ին Թուրքիայի անդամակցությանը, վիզային համակարգի պարզեցմանը և փախստականների հետ ընդունմանն առնչվող հարցեր: Գերմանիայի կանցլերը նաև ընդգծել է, որ 2016-2017 թվականների համար Թուրքիային՝ որպես փախստականներին ապաստան տվող երկիր, նախատեսվում է ցուցաբերել 3 մլրդ եվրոյի աջակցություն: Ընդ որում, այդ գումարից 500 մլն եվրոն արդեն պատրաստ է տրամադրման:

Աղբյուր` Ermenihaber.am