Թուրքիան հրաժարվեց չինական ՀՕՊ համակարգեր գնելուց

Քաղաքական10:23, 16 Նոյեմբեր 2015

Թուրքիան հրաժարվեց չինական ՀՕՊ համակարգեր գնելուց

Թուրքիան չեղյալ հայտարարեց 2 տարի առաջ հեռահար հակահրթիռային համակարգեր ձեռք բերելու համար կայացած աճուրդի արդյունքները, որով հաղթող էր ճանաչվել չինական «CPMIEC» կազմակերպությունը:

3.4 մլրդ դոլարանոց պայմանագիրը կնքվել էր պաշտպանության բնագավառում մինչ այժմ Թուրքիայի կողմից հայտարարված ամենամեծ աճուրդի արդյունքում:

Թուրքիայի` չինական արտադրության հեռահար ՀՕՊ համակարգեր գնելու փաստը հարուցել էր ԱՄն-ի և ՆԱՏՕ-ի անդամ մյուս երկրների դժգոհությունը: Վերջինները բազմիցս և տարբեր մակարդակներով հայտարարություններ էին արել՝ նշելով, որ չինական արտադրության համակարգերը չեն կարող ինտեգրվել ՆԱՏՕ-ի միասնական համակարգին, որին 2010-ից միացել է Թուրքիան:

Ըստ BBC-ի թուրքական ծառայության` չինական կազմակերպության հետ կնքած պայմանագիրը չեղարկելու մասին որոշումն օրերս ստորագրել է վարչապետ Ահմեթ Դավութօղլուն:

Թուրքական բարձրաստիճան ռազմական պաշտոնյաներից մեկն էլ անգլիական «Reuters» գործակալությանը հայտնել է, որ Թուրքիան ունենալու է իր սեփական պաշտպանական համակարգը, որի շրջանակներում կսկսի արտադրել սեփական հեռահար ՀՕՊ համակարգեր:

Աղբյուր` Ermenihaber.am