Թուրքիայի ընդդիմադիրներն ընտրությունների արդյունքները չեղարկելու պահանջ են ներկայացրել

Քաղաքական13:44, 16 Նոյեմբեր 2015

Թուրքիայի ընդդիմադիրներն ընտրությունների արդյունքները չեղարկելու պահանջ են ներկայացրել

Քրդամետ «Ժողովուրդների դեմոկրատական կուսակցությունը» (ԺԴԿ-HDP) նոյեմբերի 1-ին Թուրքիայում տեղի ունեցած խորհրդարանական ընտրությունների արդյունքները չեղյալ հայտարարելու պահանջով դիմում է ներկայացրել երկրի Բարձրագույն ընտրական խորհուրդ (ԲԸԽ):

Ըստ թուրքական «Hurriyet» թերթի կայքի` այս մասին հայտարարել է ԺԴԿ-ի Ադանայի պատգամավոր Մերալ Դանըշ Բեշթաշը` մեջլիսում տեղի ունեցած ասուլիսի ժամանակ:

Բեշթաշը, նշելով, որ ընտրություններն օրինական չեն եղել, ասել է. «ԲԸԽ-ն ներկայացրել է ընտրությունների վերջնական արդյունքները: Մենք երեկ արդյունքները չեղարկելու պահանջ ենք ներկայացրել` որպես հիմնավորում նշելով այն հանգամանքը, որ ընտրությունները չեն անցել ժողովրդավարության և հավասար մրցակցության պայմաններում»:

ԺԴԿ-ական պատգամավորը իրենց դիմումի հիմնավորումների շարքում թվարկել է նաև մամուլի վրա ճնշումը, ԺԴԿ-ի դեմ ուղղված հարձակումները, ընտրողներին ահաբեկելը և նախագահ Էրդողանի պահվածքի հետևանքով արդարության սկզբունքի խախտվելը:

Աղբյուր` Ermenihaber.am