Թուրքիան փակել է Սիրիայի հետ սահմանը

Քաղաքական08:03, 24 Նոյեմբեր 2015

Թուրքիան փակել է Սիրիայի հետ սահմանը

«Human Rights Watch» միջազգային իրավապաշտպան կազմակերպությունը տեղեկություններ է հրապարակել այն մասին, որ Թուրքիան ամբողջությամբ փակել է Սիրիայի հետ սահմանը, իսկ սահմանն անցնել ցանկացող սիրիացի փախստականները հալածվում են թուրք սահմանապահների կողմից:

Թուրքական «Hürriyet» պարբերականի կայքի համաձայն՝ «Human Rights Watch»-ը հաշվետվություն է հրապարակել՝ հիմնված հոկտեմբերի երկրորդ կեսին ռմբակոծությունների և զինված բախումների պատճառով Թուրքիա փախած 51 սիրիացու հետ հարցազրույցների վրա:

Ըստ նշյալ հաշվետվության՝ հարցազրույցին մասնակցած բոլոր սիրիացիները Թուրքիա կարողացել են մտնել միայն անօրինական ճանապարհով: Հարցվածները նշել են, որ հարյուրավոր սիրիացի կանայք, երեխաներ, տղամարդիկ հարկադրված են սահմանը հատել ապօրինի կերպով՝ գիշերը փորձելով հաղթահարել դժվարություններով լի ճանապարհը:

«Human Rights Watch»-ի՝ փախստականների գործերով մասնագետ Գարի Սիմպսոնը թեմայի վերաբերյալ հետևյալ մեկնաբանությունն է արել. «Սիրիայի հետ սահմանը փակելու Թուրքիայի քայլը սիրիական պատերազմի սարսափներից փրկվել ցանկացող հղի կանանց, երեխաներին, հիվանդներին ու վիրավորներին, ստիպում է հիմա էլ փախչել թուրք սահմանապահների հալածանքից: Մինչև այսօր Թուրքիան մեծահոգաբար հյուրընկալել է սիրիացի փախստականներին և իրավունք ունի անվտանգության նկատառումներով վերահսկելու իր սահմանները: Սակայն նա չպետք է ստիպի, որ փախստականները վերադառնան պատերազմի գոտի»:

Աղբյուր` Ermenihaber.am