Էրդողանը. «Մինչև այժմ նման դեպքեր տեղի չեն ունեցել միայն Թուրքիայի համբերատարության շնորհիվ»

Քաղաքական10:03, 25 Նոյեմբեր 2015

Էրդողանը. «Մինչև այժմ նման դեպքեր տեղի չեն ունեցել միայն Թուրքիայի համբերատարության շնորհիվ»

Թուրքիայի նախագահ Ռեջեփ Թայիփ Էրդողանը ելույթ է ունեցել «Իսլամական համագործակցության կազմակերպության» (ԻՀԿ- İİT) առևտրատնտեսական համագործակցության մշտական հանձնաժողովի ստամբուլյան նիստին:

Թուրքական «Haberler.com» լրատվակայքի տեղեկացմամբ՝ նիստին դիտորդի կարգավիճակով ներկա է գտնվել նաև Ռուսաստանի նախագահի անձնական ներկայացուցիչ, դեսպան Կոնստանտին Շուվալովը:

Իր ելույթում Էրդողանը քննադատել է Սիրիայում Ռուաստանի գործողությունները: Իսկ խոցված ռուսական ինքնաթիռի թեմայով նշել է. «Դեպքի մասին մենք անմիջապես զեկուցել ենք ՆԱՏՕ-ին: Պնդումներն այն մասին, թե այնտեղ պայքարում են ԻՊ-ի («Իսլամական պետություն» - İŞİD) դեմ, սխալ են: Այդ տարածքում ԻՊ գոյություն չունի, թող ոչ ոք ոչ ոքի չխաբի»:

Թուրքիայի նախագահը հավելել է, որ մինչ այժմ նման դեպքեր տեղի չեն ունեցել միայն Թուրքիայի համբերատարության շնորհիվ: Ըստ նրա՝ խոցված ինքնաթիռի բեկորները ընկել են նաև Թուրքիայի տարածքում՝ վնասելով երկու քաղաքացու:

Հիշեցնելով, որ ԻՀԿ անդամ երկրներում յուրաքանչյուր 1000 երեխայից 54-ը մահանում է մինչև 5 տարեկան հասակը, Էրդողանը նշել է, որ իսլամական աշխարհում հետզհետե հաճախացող բռնությունների ու տառապանքի ամենամեծ պատճառը այս երկրների կոմից եղբայրական օրենքների արհամարհումն է:

Էրդողանը նշել է, որ իսլամական աշխարհը պետք է միասնական և սկզբունքային վերաբերմունք ցուցաբերի ահաբեկչական խմբավորումների նկատմամբ, որոնց «առաջնային թիրախը իրենց հետ նույն տեսակետները չկիսող մուսուլմաններն են»: Ըստ Էրդողանի՝ անկախ ահաբեկչական խմբավորումների կրոնական պատկանելությունից չի կարելի դրանք իսլամի հետ նույն համատեքստում դիտարկել:

Աղբյուր` Ermenihaber.am