Hurriyet Daily News. Թուրքիան առկախում է Սիրիայում «ԻՊ»-ի դեմ գործողությունները

Տարածաշրջան12:35, 27 Նոյեմբեր 2015

Hurriyet Daily News. Թուրքիան առկախում է Սիրիայում «ԻՊ»-ի դեմ գործողությունները

Hurriyet Daily News-ի թղթակից Դենիզ Զեյրեքը , տեղեկացնում է, որ Թուրքիան ռուսական ինքնաթիռի խոցման միջադեպից հետո առկախել է Սիրիայում «Իսլամական Պետություն» ահաբեկչական կազմակերպության դեմ ռազմաօդային գործողությունները: Ըստ Զեյրեքի` այս մասին պայմանավորվածությունը ձեռք է բերվել թուրք և ռուս պաշտոնյաների միջև:

Թուրք լրագրողին այս մասին հայտնել է մի պաշտոնյա, ով չի ցանկացել իր անունը հրապարակել: Պաշտոնյան նաև ասել է, որ կողմերի մեջ ձեռք բերված պայմանավորվածության համաձայն` Ռուսաստանը նույնպես ժամանակավորապես դադարեցնելու է «ԻՊ»-ի դեմ գործողությունները, համենայն դեպս, մինչև կողմերի միջև լարվածությունը թուլանա:

Զեյրեքը իր հոդվածում առաջ է քաշում միջադեպի վերաբերյալ մեկ այլ ուշագրավ հանգամանք ևս:
Նա նշում է, որ հոկտեմբերի 15-ին, երբ Ռուսաստանի ռազմական գերատեսչության պաշտոնյաները այցելել են Թուրքիա, Ռուսաստանի և Թուրքիայի միջև պայմանավորվածություն է ձեռք բերվել Սիրիայում հեռահաղորդակցվելու և զգուշացումներ ուղարկելու համար օգտագործել միայն մեկ ռադիոալիք: Այդ ռադիոալիքով փոխանցվող զգուշացումները ուղարկվել են միաժամանակ և ռուսական ռազմաօդային ուժերին և Թուրքիայում գտնվող Ինջիլիքի ամերիկյան ռազմաբազա:

Մինչդեռ, լրագրողի պնդմամբ` նոյեմբերի 24-ին այս ռադիոալիքը չի օգտագործվել: Թուրքական կողմը կարծել է, թե դրանք ոչ թե ռուսական այլ սիրիական ինքնաթիռներ են, և հետագա քայլերը կատարել է ` առաջնորդվելով օդային սահմանների պահպանության մասին օրենքներով:

Աղբյուր` Ermenihaber.am