Բելգիայի վարչապետ. «Թուրքիան շատ հեռու է ԵՄ անդամակցությունից»

Քաղաքական07:28, 30 Նոյեմբեր 2015

Բելգիայի վարչապետ. «Թուրքիան շատ հեռու է ԵՄ անդամակցությունից»

Բելգիայի վարչապետ Շարլ Միշելը Եվրամիություն-Թուրքիա գագաթնաժողովի ժամանակ հայտարարել է, որ Թուրքիան ԵՄ անդամակցությունից շատ հեռու է: Ինչպես գրում է թուրքական «Haberler» լրատվական կայքը, Բելգիայի վարչապետն ընդգծել է, որ մարդու իրավունքները, դատական համակարգի անկախությունը և մամուլի ազատությունը ԵՄ կարևոր արժեքներից են:

«Թուրքիայի ԵՄ անդամակցության նոր փուլ է բացվել, որը երկխոսության հնարավորություն կընձեռի: Օրակարգ են բերվել այնպիսի հարցեր, ինչպիսիք են մարդու իրավունքները, դատաիրավական համակարգի անկախությունը և մամուլի ազատությունը: Այդ առումով կրկնում եմ, որ Թուրքիայի ամբողջական եվրաանդամակցությունը շատ հեռու է»,-ասել է Չարլ Միշելը:

Նա խոսել է ԵՄ-ի կողմից Թուրքիային հատկացվելիք 3 միլիարդ եվրո օգնության մասին՝ մանրամասնելով, որ այդ գումարը նախատեսված չէ Թուրքիայի կառավարության համար:

«Այս գումարը փախստականների առողջության, կրթության և այդպիսի խնդիրների լուծման համար է հատկացվում»,-հավելել է Միշելը՝ ընդգծելով, որ եթե Թուրքիան պահանջվող պայմանները կյանքի չկոչի, Բելգիայի կառավարությունը ֆինանսապես չի ներգրավվի այդ գործընթացում:

Աղբյուր` Ermenihaber.am