Դավութօղլու. «Ռուսաստանը վերադարձել է սովետական քարոզչական ստերին»

Քաղաքական09:42, 03 Դեկտեմբեր 2015

Դավութօղլու. «Ռուսաստանը վերադարձել է սովետական քարոզչական ստերին»

Թուրքիայի վարչապետ Ահմեթ Դավութօղլուն Ադրբեջան մեկնելուց առաջ լրագրողների հետ հանդիպման ժամանակ խոսել է նաև Ռուսաստանի և Թուրքիայի միջև առաջացած լարվածության մասին:

Ըստ թուրքական «Akşam» թերթի կայքի` Դավութօղլուն, անդրադառնալով ռուսական կողմի հայտարարություններին, որոնց համաձայն Թուրքիան «Իսլամական պետություն» (ԻՊ) ահաբեկչական կազմակերպությունից նավթամթերք է գնում, հերքել է դրանք` բնութագրելով որպես վերադարձ սովետական քարոզչական ավանդույթներին:

Դավութօղլուն մասնավորապես ասել է. «Ռուսական մամուլն ու ռուս պաշտոնյաների հայտարարություններն ինձ իմ երիտասարդությունն են հիշեցնում, երբ «սառը պատերազմի» տարինարին, նրանք նախ ասպարեզ էին նետում ստերը, այնուհետև իրենք էլ սկսում էին հավատալ դրան: Սովետական ժամանակների առանձնահատկությունները մեկ առ մեկ ջրի երես են դուրս գալիս: Թող ոչ ոք չհավատա սովետական մեքենայի ստեղծած այդ ստերին: Այն ժամանակներում, երբ տեղեկատվական դաշտը շատ թույլ էր, կարելի էր նման ստեր հորինել, որոնք նաև կարող էին որոշակի ազդեցություն ունենալ ուրիշների վրա: Այժմ թուրք-սիրիական սահմանը դիտարկվում է ամբողջ աշխարհի կողմից: Ինչպե՞ս է հնարավոր, որ մենք ԻՊ-ից նավթ գնենք ու վաճառենք»:

Թուրքիայի վարչապետը նաև կոչ է արել Ռուսաստանին Հալեպի Ազեզ գավառի (գտնվում է հակակառավարական զինված խմբավորումների վերահսկողության տակ-EH) ուղղությամբ ավիահարվածներ հասցնելու փոխարեն ռմբակոծել իսլամականների կենտրոն հանդիսացող Ռաքքա քաղաքն ու ԻՊ-ի մնացած ռազմակայանները:

Աղբյուր` Ermenihaber.am