Թուրքիան ռազմաբազա է հիմնում Իրաքի հյուսիսում

Տարածաշրջան08:11, 05 Դեկտեմբեր 2015

Թուրքիան ռազմաբազա է հիմնում Իրաքի հյուսիսում

Թուրքիան Իրաքի Մոսուլ նահանգի Բաշիքա շրջանում, ավելացնելով իր ռազմաճամբարի զորաքանակը, հիմնում է 600 հոգանոց զորակազմով ռազմաբազա: Համապատասխան համաձայնագիրը կնքվել էր նոյեմբերի 4-ին Թուրքիայի նախկին արտգործնախարար Ֆերիդուն Սինիրօղլուի և իրաքյան Քուրդիստանի ղեկավար Մասուդ Բարզանիի հանդիպման ժամանակ:

Ըստ ձեռք բերված համաձայնության՝ Թուրքիայի Շիիրթ նահանգից 400 հոգուց կազմված 3-րդ հարվածային բրիգադը (դեսանտադիվերսիոն ստորաբաժանումներ) 25 տանկերի շարասյունով ուղարկվել է Բաշիքա:

Թուրքական «Haberler» լրատվակայքը տեղեկացնում է, որ ավելի քան 2 տարի է, ինչ թուրքական ԶՈւ ստորաբաժանումները մարզում են քրդական Փեշմերգե ջոկատներին և «Իսլամական պետություն» ահաբեկչական խմբավորման դեմ պայքարող այլ ուժերի:

Թուրքական զորախմբի ուղարկումը հյուսիսային Իրաք առաջացրել է Իրաքի իշխանությունների դժգոհությունը: Մասնավորապես երկրի խորհրդարանի անվտագնության հարցերով հանձնաժողովի ղեկավար Հաքիմ ալ Զամիլին Անկարայի այդ քայլը որակել է որպես «թուրքական ներխուժում»:

Աղբյուր` Ermenihaber.am