Հրապարակվել են Իրաքում տեղակայված թուրքական ռազմակայանի լուսանկարները

Տարածաշրջան09:52, 07 Դեկտեմբեր 2015

Հրապարակվել են Իրաքում տեղակայված թուրքական ռազմակայանի լուսանկարները

Հրապարակվել են Իրաքի Քուրդիստանի Մոսուլ քաղաքից 30 կմ հեռավորության վրա գտնվող Բաշիքա շրջանում Թուրքիայի հիմնած ռազմակայանի առաջին լուսանկարները:

Թուրքական «Haberler» լրատվական կայքը հրապարակել է ռազմակայանը պատկերող մի քանի լուսանկար, որոնք հրապարակել է քրդական «RUDAW» լրատվական գործակալությունը: Կայքը նշում է, որ Բեշիքայում տեղակայված թուրք զինվորների քանակը նախատեսվում է 8000-ից հասցնել մինչև 30000-ի` նշելով, որ ռազմակայանը նախատեսված է հենց նշյալ քանակի զինվորների համար: Նշվում է, որ Բեշիքայում արդեն առկա է թուրքական 140 զրահամեքենա:

Թուրքական աղբյուրը հաղորդում է, որ բացի Բաշիքայում հիմնված ռազմակայանից, մեկ ռազմական ճամբար էլ նախատեսվում է հիմնել Զելիքանի շրջանում: Նկարներում երևում է, թե ինչպես են շինարարական մեքենաները աշխատում ռազմակայանի տարածքն ընդլայնելու համար:

Նշենք, որ թուրքական զորախմբի ուղարկումը Հյուսիսային Իրաք առաջացրել է Իրաքի իշխանությունների դժգոհությունը: Մասնավորապես երկրի խորհրդարանի անվտանգության հարցերով հանձնաժողովի ղեկավար Հաքիմ ալ Զամիլին Անկարայի այդ քայլը որակել է որպես «թուրքական ներխուժում»:

Իրաքի վարչապետ Հայդեր ալ-Էբադին էլ, հայտարարելով, որ թուրքական զորախումբն առանց Իրաքի կենտրոնական իշխանությունների թույլտվության է ներխուժել երկրի տարածք, Թուրքիայից պահանջել է 48 ժամվա ընթացքում հանել զորքերը Իրաքի տարածքից:

Աղբյուր` Ermenihaber.am