Թուրքիայի հարավարևելյան շրջաններում պարետային ժամ է

Տարածաշրջան13:07, 14 Դեկտեմբեր 2015

Թուրքիայի հարավարևելյան շրջաններում պարետային ժամ է

Թուրքիայի քրդաբնակ Շըրնաք նահանգի Ջիզրե և Սիլոփի շրջաններում այսօր ժամը 23:00-ից սկսած պարետային ժամ է հայտարարվել:

Ըստ թուրքական «Haberturk» թերթի կայքի` այս մասին հայտարարել են Շըրնաքի նահանգապետը նահանգի ոստիկանության և ժանդարմերիայի պետերի հետ կազմակերպած մամուլի ասուլիսի ժամանակ:

Նահանգապետ Ալի Իսհան Սուն նշել է, որ պարետային ժամը (փողոց դուրս գալու արգելք) հայտարարվում է երկրում ահաբեկչական համարվող «Քուրդիստանի բանվորական կուսակցության» (ՔԲԿ-PKK) զինյալների դեմ ուժայինների կողմից կազմակերպվելիք գործողությունների ժամանակ բնակիչների կյանքի և գույքի ապահովության համար:

Այսօր Թուրքիայի ժամանակով ժամը 16:00-ից սկսած պարետային ժամ է հայտարարվել Մարդինի նահանգի Նուսայբին շրջանի 4 թաղամասերում:

Նշեք, որ վերը թվարկված շրջաններում օրեր առաջ էր հանվել պարետային ժամը, որի ընթացքում թուրք ուժայինների ու քուրդ զինյալների միջև տեղի ունեցած բախումների հետևանքով զոհեր ու վիրավորներ էին գրանցվել երկու կողմերից էլ:

Ավելացնենք նաև, որ արդեն ավելի քան 10 օր պարետային ժամ է գործում Դիարբեքիրի Սուր կենտրոնական շրջանում, որտեղ շարունակվում են բախումները թուրքական հատուկ ստորաբաժանումների ու քուրդ զինյալների միջև:

Աղբյուր` Ermenihaber.am