Իրաքն Անկարայից պահանջում է թուրքական զորքի ոչ թե մասնակի, այլ ամբողջական դուրսբերում

Տարածաշրջան07:47, 16 Դեկտեմբեր 2015

Իրաքն Անկարայից պահանջում է թուրքական զորքի ոչ թե մասնակի, այլ ամբողջական դուրսբերում

Հյուսիային Իրաքում տեղակայված թուրքական զինուժի մի մասի հեռացումից հետո Իրաքի կառավարությունը հանդես է եկել նոր հայտարարությամբ` պահանջելով թուրքական զորքի ոչ թե մասնակի, այլ ամբողջական դուրսբերումը

Ըստ թուրքական «Mİlliyet» թերթի կայքի` հայտարարության մեջ մասնավորապես ասվում է. «Հարևան Թուրքիայի` Իրաքի ինքնիշխանությունը հարգելու և Իրաքի սահմաններից ամբողջապես դուրս գալու անհրաժեշտությունը դեռևս ուժի մեջ է»:

Նախօրեին Իրաքի Մոսուլ քաղաքից մոտ 30 կմ հեռավորության վրա գտնվող Բաշիքա շրջանի Զելիքան ճամբարից թուրքական զորքերի դուրսբերմանն անդրադարձել էր նաև վարչապետ Ահմեթ Դավութօղլուն` ասելով, որ դա արվել է` ելնելով ռազմական անհրաժեշտությունից: Վերջինս նաև նշել էր, որ Բաղդադի և Անկարայի միջև լարվածությունը խորանում է 3-րդ երկրի պատճառով` ակնարկելով Իրանի Իսլամական Հանրապետությանը:

Հիշեցնենք, որ օրեր առաջ թուրքական զորաջոկատներն առանց Իրաքի կենտրոնական իշխանությունների թույլտվության ներխուժել էին Իրաքյան Քուրդիստանի Բաշիքա շրջան, որտեղ հաստատվել են ավելի վաղ թուրքերի կողմից հիմնած ռազմակայանում:

Իրաքյան Քուրդիստանի զինված ուժերի` փեշմերգայի, զորաջոկատները մարզելու նպատակով արդեն 2 տարի Բաշիքայում գտնվող որոշակի քանակով թուրք զինվորականների թվի կտրուկ ավելացումը «Իսլամական պետություն» ահաբեկչական խմբավորման դեմ պայքարը արդյունավետ դարձնելու նպատակ ունի:

Աղբյուր` Ermenihaber.am