Թուրքիայի Շըրնաք նահանգում շարունակվում են թուրք-քրդական բախումները

Տարածաշրջան07:34, 17 Դեկտեմբեր 2015

Թուրքիայի Շըրնաք նահանգում շարունակվում են թուրք-քրդական բախումները

Իրաքի հետ սահմանակից Թուրքիայի հարավարևելյան Շըրնաք նահանգի Ջիզրե և Սիլոփի շրջաններում թուրք ուժայինները ռազմագործողություններ են իրականացնում «Քուրդիստանի բանվորական կուսակցության» (ՔԲԿ-PKK) զինյալների դեմ:

Ինչպես հաղորդում է թուրքական «milliyet» թերթի կայքը, թուրքական ուժերի կողմից դեկտեմբերի 16-ին իրականացված օպերացիայի արդյունքում Սիլոփիում սպանվել է 1, իսկ Ջիզրեում` 22 PKK-ի գրոհային:

Նշվում է, որ օպերացիան տևել է մինչև ուշ երեկո: Վերոհիշյալ շրջանների փողոցներում բացի ոստիկանական ուժերից տեղակայվել են նաև թուրքական ժանդարմերիայի ստորաբաժանումներ:

Վնասազերծված քուրդ զինյալների շրջանում եղել են ականանետից կրակողներ: Նրանք նաև օգտագործել են «Kanas» տեսակի զենք:

Հիշեցնենք, որ արդեն 3-րդ օրն է, ինչ Սիլոփում և Ջիզրեում հայտարարված է պարետային ժամ, արգելված է ելումուտը: Փողոցներում շարունակ լսվում են կրակոցներ:

Աղբյուր` Ermenihaber.am