Թուրքիան Իրանին և Սաուդյան Արաբիային ուղղված կոչում քննադատել է միայն իրանական կողմին

Տարածաշրջան11:38, 05 Հունվար 2016

Թուրքիան Իրանին և Սաուդյան Արաբիային ուղղված կոչում քննադատել է միայն իրանական կողմին

Թուրքիայի արտաքին գործերի նախարարությունը արձագանքել է վերջին օրերին Սաուդյան Արաբիայի և Իրանի Իսլամական Հանրապետության միջև առաջացած լարվածությանը:

Միջանկյալ նշենք, որ լարվածությունը առաջացել էր այն բանից հետո, երբ մի քանի օր առաջ Սաուդյան Արաբիայում մահապատժի էր ենթարկվել շիա հայտնի աստվածաբան Նիմր ան- Նիմրըն:

Թուրքական «haberler» լրատվական կայքի իրազեկմամբ՝ Թուրքիայի արտաքին գործերի նախարարության հայտարարության մեջ կոչ է արվել երկու երկրներին նվազեցնել առկա լարվածությունը, որպեսզի այն որևէ կերպ չանդրադառնա տարածաշրջանային անվտանգության և խաղաղության վրա:

Բացի դրանից հայտարարության մեջ Թուրքիայի ԱԳՆ-ն քննադատել է Իրանի մայրաքաղաք Թեհրանում և Մեշհեդ քաղաքում Սաուդյան Արաբիայի դիվանագիտական առաքելությունների վրա իրականացված հարձակումները` նշելով, որ Վիեննայի հռչակագրի համաձայն բոլոր երկրները պարտավոր են ապահովել իրենց տարածքում գտնվող դիվանագիտական անձնակազմերի անվտանգությունը:

Թուրքական աղբյուրը ուշադրություն է հրավիրել այն հանգամանքին, որ հայտարարության մեջ որևէ հիշատակություն չկա Սաուդյան Արաբիայում մահապատժի ենթարկված 47 անձանց մասին, որոնց թվում է եղել նաև հայտնի շիա աստվածաբանը:

Աղբյուր` Ermenihaber.am