Էրդողան. «Սուլթանահմեթ հրապարակում պայթյունն իրականացրել է սիրիացի մահապարտը»

Տարածաշրջան12:12, 12 Հունվար 2016

Էրդողան. «Սուլթանահմեթ հրապարակում պայթյունն իրականացրել է սիրիացի մահապարտը»

Թուրքիայի նախագահ Ռեջեփ Թայիփ Էրդողանը հայտարարել է, որ Ստամբուլի Սուլթանահմեթ հրապարակում պայթյունն իրականացրել է սիրիացի մահապարտը:

Թուրքական «T24» լրատվական կայքի տեղեկացմամբ՝ այս մասին Էրդողանը հայտնել է դեսպանների 8-րդ համաժողովում ելույթի ընթացքում:

Էրդողանը նշել է, որ այս դեպքը ևս մեկ անգամ ցույց տվեց, որ ահաբեկչությունը կանխելու համար հարկավոր է դրա դեմ միասնաբար պայքարել: Նա վստահեցրել, որ Թուրքիան շարունակելու է ահաբեկչության դեմ իր վճռական և սկզբունքային պայքարը:

Էրդողանն ընդգծել է, որ իրենք ահաբեկչական խմբավորումների միջև տարբերություն չեն դնում: «Մեզ համար ԻՊ-ի («Իսլամական պետություն»), PKK-ի («Քուրդիստանի բանվորական կուսակցություն») կամ PYD-ի (Սիրիայում գործող քրդական «Ժողովրդավարական միություն կուսակցություն») միջև տարբերություն չկա: Այս տարածաշրջանում գործող բոլոր ահաբեկչական կազմակերպությունների հիմնական թիրախը Թուրքիան է»,- հավելել է Էրդողանը:

Աղբյուր` Ermenihaber.am