Թուրքիայում գործազրկության մակարդակը հասել է 10.5%-ի

Տնտեսական10:19, 15 Հունվար 2016

Թուրքիայում գործազրկության մակարդակը հասել է 10.5%-ի

2015թ. հոկտեմբերի դրությամբ Թուրքիայում գործազուրկների թիվը նախորդ տարվա համեմատ ավելացել է 104.000 մարդով՝ հասնելով 3.147.000-ի: Թուրքական «Hürriyet» թերթի կայքի տեղեկացմամբ՝ գործազրկության մակարդակը, այսպիսով, բարձրացել է 0,1 տոկոսով՝ հատելով 10.5 տոկոսի սահմանը:

Ընդ որում, ոչ գյուղատնտեսական ոլորտի գործազրկության մակարդակը ևս աճել է 0.1 տոկոսով՝ կազմելով 12.6 տոկոս: Գործազրկությունը մասնավորապես շատացել է 15-64 տարիքային խմբում, իսկ 15-24 տարիքային խմբում 0.4 տոկոսով նվազել է:

Իսկ աշխատանք ունեցողների թիվը 2015թ. հոկտեմբերի դրությամբ նախորդ տարվա համեմատ ավելացել է 718.000-ով՝ կազմելով 26.856.000: Աշխատողների ընդհանուր տոկոսն, այսպիսով, ավելացել է 0.5 միավորով՝ հասնելով 46.2 տոկոսի:

2015թ. հոկտեմբերի դրությամբ 822.000-ով ավելացել է նաև Թուրքիայի աշխատունակ քաղաքացիների թիվը՝ հասնելով 30.003.000-ի: Այսինքն, բնակչության աշխատունակության մակարդակն ավելացել է 0.6 տոկոսով՝ կազմելով 51.6 տոկոս: Ընդ որում, տղամարդկանց շրջանում աշխատուժը կազմում է 71.9 տոկոս, իսկ կանանց շրջանում՝ 31.8 տոկոս:

Աղբյուր` Ermenihaber.am