Թուրքիայում վաճառքի է հանվել շուրջ 1.300 հյուրանոց

Տնտեսական13:56, 02 Փետրվար 2016

Թուրքիայում վաճառքի է հանվել շուրջ 1.300 հյուրանոց

Թուրքիայում վերջին շրջանում տիրող ներքին լարված իրավիճակն ու տնտեսական լճացումը մեծ վնաս են հասցրել զբոսաշրջության ոլորտին: Թուրքական «Zaman» թերթը տեղեկացնում է, որ ոլորտում գործունեություն ծավալող բազմաթիվ թուրք գործարարներ հայտնվել են սնանկացման եզրին: «Հյուրանոցատերերի մեծ մասը չի կարողանում վճարել իր բիզնեսը զարգացնելու համար վերցրած վարկերը, ինչի պատճառով էլ հարկադրված է դուրս գալ ոլորտից», - մեկնաբանում է գործարար Իսմաիլ Օզը:

Վերջին ամիսների ընթացքում վաճառքի է հանվել Էգեյան և Միջերկրական ծովերի ափերին տեղակայված շուրջ 1300 հյուրանոց: Բոլոր այդ հյուրանոցների ընդհանուր արժեքը հատում է 30 մլրդ լիրայի ( մոտ 10 մլրդ դոլար) սահմանը:

Տուրիզմի մայրաքաղաք համարվող Անթալիայում այցելուների բացակայության պատճառով արդեն 4 ամիս է՝ մեծ թվով հյուրանոցներ փակ են: Այստեղ վաճառքի է հանվել 410 հյուրանոց, որոնցից 120-ը՝ 5 աստղանի: Իզմիրում վաճառվում է 203 մեծ և փոքր հյուրանոց, հյուրատուն ու հանգստի գոտի, Այդընում՝ 162, Բալըքէսիրում ՝ 139, Չանաքքալեում՝ 35:

Զբոսաշրջության ոլորտի ներկայացուցիչներից Մեհմեթ Իշլերի կարծիքով՝ ընթացիկ տարում զբոսաշրջիկների ընդհանուր թիվը և եկամուտները կնվազեն ևս 35 տոկոսով:

Հիշեցնենք, որ ռուս-թուրքական ճգնաժամի պատճառով դադարել է ռուս զբոսաշրջիկների հոսքը, մինչդեռ նախկինում տարեկան ավելի քան 4 մլն ռուս զբոսաշրջիկ էր այցելում Թուրքիա: Սուլթանահմեթի պայթյունից հետո գերմանական զբոսաշրջային ընկերությունները դադարեցրել են թուրքական տուրերը, գերմանացիները խուսափում են այդ երկիր այցելելուց:

Անգլիան կոչ է անում իր քաղաքացիներին վաճառել Թուրքիայում ունեցած ամեն ինչ և հեռանալ այդ երկրից: Անվտանգության նկատառումներից ելնելով Թուրքիայից խուսափում են նաև եվրոպական մյուս երկրները:

Աղբյուր` Ermenihaber.am