Իտալիան համաձայնել է. Թուրքիան ԵՄ-ից կստանա 3 մլրդ եվրո

Տնտեսական13:52, 02 Փետրվար 2016

Իտալիան համաձայնել է. Թուրքիան ԵՄ-ից կստանա 3 մլրդ եվրո

Իտալիան այլևս չի արգելափակի Թուրքիային 3 միլիարդ եվրո տրամադրելու վերաբերյալ ԵՄ-ի ծրագիրը: Թուրքական «Sabah» թերթի կայքի տեղեկատվությամբ՝ այս մասին հայտարարել է Իտալիայի վարչապետ Մատտեո Ռենզին:

«Մենք կաջակցենք Թուրքիային՝ մարդկանց կյանքերը փրկելու համար», - նշել է վարչապետը: Աղբյուրի համաձայն՝ անհրաժեշտ տեխնիկական աշխատանքների ավարտից հետո Թուրքիային տրամադրվելիք ողջ գումարն արդեն լիովին հասանելի կլինի օգտագործման համար:

Նշվում է, որ դեպի Եվրոպա փախստականների հոսքը կանխելու պայմանով Թուրքիային տրամադրվելիք նշյալ ֆինանսական օգնությունից 1 մլրդ եվրոն կհատկացվի Եվրամիության (ԵՄ) բյուջեից: Մնացած 2 միլիարդը կապահովվի եվրոպական երկրների պետական բյուջեներից:

Թուրքիային տրամադրվելիք ֆինանսական աջակցության առյուծի բաժինը կհատկացնեն Գերմանիան (427.5 մլն եվրո), Անգլիան (327.6 մլն եվրո), Ֆրանսիան (309.2 մլն եվրո), Իտալիան (224.9 մլն եվրո):

Հիշեցնենք, որ 2015-ի նոյեմբերի 29-ին Թուրքիա- ԵՄ գագաթաժողովի ժամանակ Բրյուսելը պարտավորվել էր 3 մլրդ եվրո տրամադրել Թուրքիային` փախստականների հումանիտար կարիքները հոգալու և նրանց իր տարածքում պահելու նպատակով: Սակայն Իտալիան արգելափակել էր ԵՄ նշյալ որոշումը՝ պնդելով, որ Անկարան անհրաժեշտ միջոցները չի ձեռնարկել սահմանային հսկողությունը խստացնելու և գաղթականների հոսքը դադարեցնելու ուղղությամբ:

Աղբյուր` Ermenihaber.am