Թուրքիան չի թույլատրել ռուսական ինքնաթիռին դիտորդական թռիչք կատարել

Տարածաշրջան07:50, 04 Փետրվար 2016

Թուրքիան չի թույլատրել ռուսական ինքնաթիռին դիտորդական թռիչք կատարել

Ռուսաստանի Դաշնության (ՌԴ) պաշտպանության նախարարությունը հայտնել է, որ թուրքական իշխանությունները ռուսական «An-30B» ինքնաթիռին չեն թույլատրել դիտորդական թռիչք կատարել Թուրքիայի օդային տարածքով:

Ինչպես փոխանցում է թուրքական «haber.sol» լրատվական կայքը, Ռուսաստանի պաշտպանության նախարարության ներկայացուցիչն ասել է, որ նման քայլով Թուրքիան խախտում է «Բաց երկնքի» մասին պայմանագրով ստանձնած իր պարտականությունները:

Նշենք, որ ռուսական «An-30B» ինքնաթիռը 2016թ. փետրվարի 1-5 ընկած ժամանակահատվածում պետք է դիտորդական թռիչք իրականացներ Թուրքիայի օդային տարածքով:

Թուրքական մեկ այլ «haberler» լրատվամիջոցն էլ նշում է, որ ռուսական ինքնաթիռի թռիչքի հեռավորությունը Թուրքիայի օդային տարածքով կազմելու էր 900կմ: Ինքնաթիռի մեջ բացի ռուս տեսուչներից, պետք է լինեին նաև թուրք մասնագետներ:

«Բաց երկնքի» մասին պայմանագիրը 1992թ. ստորագրվել է 24 երկրի կողմից: Կողմերը պայմանավորվել են ամեն տարի դիտորդական թռիչքներ իրականացնել միմյանց օդային տարածքներով: 2014 պայմանագիրը ստորագրած երկրների թիվը հասել է 33-ի:

Աղբյուր` Ermenihaber.am