Անգլիական կուսակցությունը ֆիլմ է նկարել Թուրքիայի եվրաինտեգրման վնասների մասին

Քաղաքական09:40, 05 Փետրվար 2016

Անգլիական կուսակցությունը ֆիլմ է նկարել Թուրքիայի եվրաինտեգրման վնասների մասին

«Միացյալ թագավորության անկախ կուսակցությունը» (UK Independence Party- UKIP) կարճամետրաժ ֆիլմ է նկարահանել այն մասին, թե ինչ դժվարություններ են սպառնում Անգլիային, եթե Թուրքիան անդամակցի Եվրամիությանը (ԵՄ):

Թուրքական «Hürriyet» թերթի կայքի տեղեկացմամբ՝ ընդամենը 4 րոպեանոց տեսանյութի վերջում անգլիացիներին կոչ է արվում Եվրամիությունից Անգլիայի դուրս գալու վերաբերյալ անցկացվելիք հանրաքվեում քվեարկել «դուրս գալու» օգտին:

UKIP-ի ֆիլմում մտավախություն է հայտնվում, որ Թուրքիայի՝ ԵՄ անդամ դառնալու դեպքում 1.5 մլն թուրք գաղթելու է Անգլիա: Նշվում է նաև, որ անդամակցելու դեպքում բնակչության չափազանց մեծ թվի պատճառով Թուրքիան կվատնի ԵՄ-ի օգնության բյուջեի 1/3-ը:

Տեսանյութում հիշատակվում է նաև այն փաստը, որ 20-րդ դարի երկրորդ կեսից մինչ օրս Թուրքիայի քրիստոնյա բնակչության թիվը 100 անգամ նվազել է:

Թուրքիայի ԵՄ անդամակցությանը դեմ հանդես եկող UKIP-ը ուշադրություն է հրավիրում այն հանգամանքի վրա, որ Թուրքիայի տարածքի 97 տոկոսը գտնվում է Ասիայում և միայն 3 տոկոսն է Եվրոպայի մաս կազմում:

Աղբյուր` Ermenihaber.am