Թուրքիան և Ուկրաինան համատեղ ռազմական տեխնիկա կարտադրեն

Տարածաշրջան13:22, 16 Փետրվար 2016

Թուրքիան և Ուկրաինան համատեղ ռազմական տեխնիկա կարտադրեն

Թուրքիայի Պաշտպանական արդյունաբերության գլխավոր վարչության ղեկավար Իսմայիլ Դեմիրը Ուկրաինայում հանդիպում է ունեցել Ուկրաինայի Ազգային անվտանգության և պաշտպանության խորհրդի (RNBO) քարտուղար Դմիտրի Տուրչինինովի հետ:

Ըստ «Haberler» լրատվական կայքի` հանդիպման ժամանակ կողմերի միջև ռազմատեխնիկական ոլորտում համագործակցության հարցում համաձայնություն է ձեռք բերվել:

Թուրքական կայքի բնութագրմամբ` ռուս-թուրքական ճգնաժամը կարծես թե խթան է հանդիսացել որպեսզի Թուրքիան և Ռուսաստանի «համար մեկ թշնամին»` Ուկրաինան, համագործակցության նոր եզրեր փնտրեն:

Կողմերը համաձայնության են եկել ռազմատեխնիկական ոլորտում երկկողմ համագործակցության շրջանակներում ստեղծել հատուկ խումբ, որը կուսումնասիրի այն զինատեսակների պակասը, որոնց կարիքը ունեն երկու երկրները, ապա կնախաձեռնվի այդ զենքերի համատեղ արտադրությունը` ժամանակակից տեխնոլոգիաների կիրառմամբ:

Հանդիպման ընթացքում Տուրչինովը ընգծել է, որ Թուրքիան Ուկրաինայի համար հանդիսանում է ռազմավարական գործընկեր:

Հիշեցնենք, որ ավելի վաղ պաշտոնական այցով Ուկրաինայում գտնվող Թուրքիայի վարչապետ Ահմեթ Դավութօղլուն ուկրաինացի պաշտոնակից Արսենի Յացենյուկի հետ համատեղ մամուլի ասուլիսի ժամանակ անհանգստությունն էր հայտնել Ռուսաստանի կողմից Հայաստանին ցուցաբերվող օժանդակության կապակցությամբ: