Թուրք երկրպագուները քարկոծել են ռուսական «Լոկոմոտիվ» ակումբի ավտոբուսը

Մարզական11:14, 17 Փետրվար 2016

Թուրք երկրպագուները քարկոծել են ռուսական «Լոկոմոտիվ» ակումբի ավտոբուսը

Ստամբուլում քարկոծման է ենթարկվել Մոսկվայի «Լոկոմոտիվ» ֆուտբոլային ակումբի մարզիկներին տեղափոխող ավտոբուսը: Ըստ թուրքական «Aksam» պարբերականի` դեպքը տեղի է ունեցել փետրվարի 16-ին, ռուսական և թուրքական «Ֆեներբահչե» ակումբների միջև Եվրոպայի լիգայի 1/16 եզրափակչի շրջանակներում կայանալիք խաղից առաջ:

«Լոկոմոտիվ»-ի երկրպագուների հարցերով զբաղվող տնօրեն Ալեքսեյ Երունովը, խոսելով թուրք երկրպագուների պահվածքի մասին ասել է. «Մարզադաշտից դուրս փոքր միջադեպ եղավ: Թուրքական կողմը քարկոծեց ավտոբուսը: Սակայն ոստիկաններն անմիջապես գործի անցան և նրանց կանգնեցնելու համար անհրաժեշտ միջոցներ ձեռնարկեցին»:

Երունովի խոսքերով տուժածներ չեն եղել:

Թուրքական աղբյուրը հայտնում է, որ միջադեպի հետ կապված 3 հոգի բերման է ենթարկվել: Վերջիններս ավտոբուսի վրա նետել էին շշեր:

Ոստիկանության տարածած հայտարարության համաձայն` միջադեպը տեղի ունեցել Ստամբուլի Քադիքյոյ թաղամասում, որտեղ և գտնվում է «Ֆեներբահչե» ֆուտբոլային ակումբի մարզադաշտը:

Նշենք, որ ֆուտբոլային հանդիպումն ավարտվել էր «Ֆեներբահչե»-ի հաղթանակով` 2-0 հաշվով: Երկու գնդակի հեղինակ էր դարձել թուրքական ակումբի ավագ Ժոզեֆ Սոուզան:

Աղբյուր` Ermenihaber.am