Կրկին ահաբեկչություն Անկարայում. 28 զոհ, 61 վիրավոր

Տարածաշրջան22:28, 17 Փետրվար 2016

Կրկին ահաբեկչություն Անկարայում. 28 զոհ, 61 վիրավոր

Թուրքիայի մայրաքաղաք Անկարայի կենտոնական փողոցներից մեկում ժամեր առաջ պայթյուն է որոտացել: Ըստ թուրքական մամուլի՝ պայթյունը տեղի է ունեցել զինվորականներին տեղափոխող ավտոբուսների անցնելու ժամանակ: Այն պահին, երբ ավտոբուսները կանգ են առել կարմիր լույսի տակ, լյուքս դասի ուղևորատար մի մեքենա կանգառել է զինվորականներին տեղափոխող մեքենաների միջև և պայթել: Պայթյունի թիրախում հայտնված 2 ավտոբուսներում գտնվող զինվորականների մեծ մասը եղել են սերժանտներ:

Թուրքիայի իշխանությունների կողմից որպես ահաբեկչական հարձակում որակված պայթյունի հետևանքով կան զոհեր ու վիրավորներ: Դեպքի վայր են մեկնել մեծ թվով շտապօգնության մեքենաներ, հրշեջներ, փրկարարներ:

Թուրքիայի փոխվարչապետ Նուման Քուրթուլմուշը դեպքի առնչությամբ հանդես է եկել հայտարարությամբ՝ ասելով. «Այսօր Անկարայում ժամը 18:30-ին Ինոնյու պողատայի վրա, այն պահին, երբ զինվորականներ տեղափոխող մեքենաների շարասյունը կանգ է առել կարմիր լույսի տակ, պայթյուն է տեղի ունեցել: Այս պահի դրությամբ ունենք 28 զոհ և 61 վիրավոր: Խստորեն դատապարտում ենք այս ահաբեկչությունը»:

«Sabah»պարբերականի տեղեկացմամբ` դեպքի պատճառով Թուրքիայի վարչապետ Ահմեթ Դավութօղլուն հետաձգել է Բրյուսել կարարելիք այցը, իսկ նախագահի նստավայրում հրավիրվել է շտապ խորհրդակցություն:

Նշենք, որ պայթյունը տեղի է ունեցել Անկարայի սրտում: Քաղաքի այս մասում են գտնվում Թուրքիայի խորհրդարանի, Պետեկամուտների կոմիտեի, Զինված ուժերի (ԶՈւ) գլխավոր շտաբի, ռազմածովային և ռազմաօդային զորքերի հրամանատարության շենքերը:

Աղբյուր` Ermenihaber.am