Թուրքիայի, Վրաստանի և Ադրբեջանի արտգործնախարարները հանդիպել են Թբիլիսիում

Քաղաքական13:29, 19 Փետրվար 2016

Թուրքիայի, Վրաստանի և Ադրբեջանի արտգործնախարարները հանդիպել են Թբիլիսիում

Փետրվարի 19-ին Թբիլիսիում եռակողմ հանդիպում է տեղի ունեցել Թուրքիայի, Ադրբեջանի և Վրաստանի արտաքին գործերի նախարարների միջև: Ինչպես հաղորդում է թուրքական «cihan» լրատվական գործակալությունը` հանդիպման ժամանակ արտգործնախարարներ Մևլութ Չավուշօղլուն, Էլմար Մամեդյարովը և Միխայիլ Ջանալիդզեն քննարկել են Բաքու-Թբիլիսի-Ջեյհան նավթամուղի, Բաքու-Թբիլիսի գազամուղի, Բաքու-Թբիլիսի-Կարս երկաթուղու, ինչպես նաև տրանսանատոլական գազատարի (TANAP) նախագծի վերաբերյալ առանցքային հարցեր:

Հանդիպումից հետո նախարարները մեկնել են Վրաստանի Քարթսահի քաղաք և տեղում ծանոթացել Բաքու-Թբիլիսի–Կարս երկաթուղու կառուցման աշխատանքներին:

Թուրքական «Anadolu» լրատվական գործակալության տեղեկացմամբ` Չավուշղօղլուն Թբիլիսիում անդրադարձել է օրերս Անկարայում տեղի ունեցած պայթյունին: Նա պնդել էր, որ տեղի ունեցածի կազմակերպիչները կապված են Սիրիայի քրդական «Ժողովրդավարական միություն կուսակցության» (ԺՄԿ-PYD) ռազմական թև հանդիսացող «Ժողովրդի պաշտպանության ուժերի» (ԺՊՈւ-YPG) և «Քուրդիստանի բանվորական կուսակցության» (ՔԲԿ-PKK) հետ:

Հիշեցնենք, որ փետրվարի 18-ին Չավուշօղլուն մեկնել էր Բաքու, որտեղ հանդիպել էր Ադրբեջանի նախագահ Իլհամ Ալիևի և մի շարք այլ բարձրաստիճան պաշտոնյաների հետ:

Բաքվում Չավուշօղլուն անդրադարձել էր ղարաբաղյան հիմնախնդրին:

Աղբյուր` Ermenihaber.am