Որքա՞ն է Թուրքիայի ազգային փոքրամասնությունների թվաքանակը. հայ պատգամովորի հարցանդումը

Տարածաշրջան08:00, 22 Փետրվար 2016

Որքա՞ն է Թուրքիայի ազգային փոքրամասնությունների թվաքանակը. հայ պատգամովորի հարցանդումը

Թուրքիայի ընդդիմադիր «Ժողովրդահանրապետական կուսակցությունից» (ԺՀԿ-CHP) ընտրված պատգամավոր հայկական ծագում ունեցող Սելինա Դողանը ներքին գործերի նախարարին հասցեագրված հարցապնդում է ներկայացրել խորհրդարան:

Դողանը Թուրքիայի ներքին գործերի նախարար Էֆքան Ալայից հետաքրքրվել է Թուրքիայում բնակվող հայ, հույն, հրեա, և ասորի փոքրամասնությունների թվաքանակի մասին: Դողանը «տեղեկատվություն ստանալու մասին» օրենքի շրջանակներում նույն թեմայի վերաբերյալ տվյալներ է ստանալու նպատակով դիմել է նաև Թուրքիայի ներքին գործերի նախարարության բնակչության և քաղաքացիների գործերի գլխավոր վարչությանը:

Դողանը ներքին գործերի նախարարին ուղղած իր հարցապնդման մեջ հիշեցրել է, որ փոքրամասնությունների նկատմամբ «ազգության կոդի» կիրառման նպատակահարմարության վերաբերյալ մեջլիսում տեղի ունեցած քննարկման ժամանակ նախարար Ալան նշել էր, որ այդ կոդավորումը (հատուկ ծածկագրերի օգտագործումը) ազգային ինքնությունների հետ կապ չունի: Ըստ նախարարի դրա նպատակը ազգային փոքրամասնությունների թվաքանակի հաշվումն է:

«Բնակչության թվաքանակի և ժողովրդագրական պատկերի իմացությունը հանրային ծառայությունների իրականացման և պլանավորման տեսանկյունից շատ կարևոր է: Փոքրամասնություններն իրենց հանրային ծառայությունները (ուսում, կրոնական արարողություններ, առողջապահություն) հիմնականում հոգում են իրենց հիմնադրամների միջոցով: Այդ իսկ պատճառով փոքրամասնությունների հիմնադրամները համայնքի հանրային ծառայությունները կարգավորելու համար ուղղակի պարտավոր են իմանալ համայնքի թվաքանակը: Բացի այդ քրիստոնեական համայնքները, որոնք իրենց բնակչության ճշգրիտ թվաքանակը չեն կարողանում իմանալ, դժվարանում են նույնիսկ հոգևոր առաջնորդների ընտրության հարցում:

Այս համատեքստում ինչքան է Թուրքիայի Հանրապետության քաղաքացի հանդիսացող հայերի, հրեաների, հույների ու ասորիների թիվը»,- ասված է հարցապնդման մեջ:

Աղբյուր` Ermenihaber.am