Թուրքիայի պետական արխիվներում չի պահպանվել հայկական «Ժամանակ» թերթը

Մշակութային07:41, 03 Մարտ 2016

Թուրքիայի պետական արխիվներում չի պահպանվել հայկական «Ժամանակ» թերթը

Օսմանահպատակ հայերի կողմից հրատարակվող ամենահին թերթերից մեկը՝ «Ժամանակը», չի պահպանվել այս երկրի պետական արխիվներում: Թուրքական «demokrathaber.com» լրատվակայքի տեղեկացմամբ՝ Թուրքիայի Ազգային մեծ ժողովի (ԹԱՄԺ -TBMM) հայ պատգամավոր Սելինա Դողանը թեմայի վերաբերյալ հարցում է արել մեջլիսում:

Ընդդիմադիր «Ժողովրդահանրապետական» կուսակցությունը (ԺԴԿ - CHP) ներկայացնող Դողանն իր հարցումը նախ ուղղել է Թուրքիայի պետական արխիվների տնօրինությանը, բայց բացասական պատասխան ստանալուց հետո հարցը վերահասցեավորել է մշակույթի և զբոսաշրջության նախարարությանը:

«Ակոս» թերթի տեղեկացմամբ՝ հայ պատգամավորն ընդգծել է, որ «Ժամանակ» թերթը հետազոտողների համար տեղեկատվության կարևորագույն սկզբնաղբյուր կարող է հանդիսանալ:

«Ժամանակ»-ը Թուրքիայում առանց ընդմիջումների հրատարակված ամենահին թերթն է: Այս թերթը թե Օսմանյան կայսրության, թե Թուրքիայի Հանրապետության վկան է: Այս տեսակետից անվիճելի է նման թերթի՝ պետության կողմից արխիվացման կարևորությունը»,- նշել է Դողանը:

Նա հավելել է, որ իրենց հարցմանը պետական արխիվների գլխավոր վարչությունից պատասխանել են, թե «Ժամանակ» թերթը իրենց մոտ պահպանված չէ, սակայն որպես գրադարանական նյութ այն կարող է պահպանված լինել ազգային գրադարանային վարչության արխիվներում: Այդ պատճառով էլ այս անգամ նույն հարցումն ուղղվել է մշակույթի նախարարությանը:

«Ես մեծ հետաքրքրությամբ սպասում եմ տրվելիք պատասխանին:
Հայկական հարցի վերաբերյալ ամեն առիթով «արխիվները բացենք» կարգախոսի միջոցով թեմայից խուսանավել փորձող այս քաղաքական ուժը նախ և առաջ պիտի արխիվացնի Թուրքիայի տարածքում ապրած հայերի ամենահին թերթը»:

Հիշեցնենք, որ հայկական «Ժամանակ» թերթն իր գործունեությունը սկսել է 1908-ին: Բացի հայ համայնքի կյանքը լուսաբանելուց՝ թերթն անդրադառնում և լուսաբանում էր նաև Օսմանյան պետության քաղաքական իրադարձությունները: