Արաբական պետությունների լիգան կփակի Թուրքիայում իր գրասենյակը

Տարածաշրջան12:28, 09 Մարտ 2016

Արաբական պետությունների լիգան կփակի Թուրքիայում իր գրասենյակը

Արաբական պետությունների լիգայի (ԱՊԼ) անդամ-երկրները նախատեսում են փակել կազմակերպության` Թուրքիայում, Հարավային Սուդանում, Հարավաֆրիկյան հանրապետությունում և Մալթայում գտնվող գրասենյակները: Այս մասին հայտնում է թուրքական «Gazetevatan» թերթը:

Ըստ աղբյուրի` վերոնշյալ երկրներում ԱՊԼ ներկայացուցչությունները փակելու վերաբերյալ որոշման նախագիծը ընդունվել է մարտի 8-ին` Բահրեյնում, կազմակերպության անդամ երկրների առաջնորդների մասնակցությամբ տեղի ունեցած նիստի ժամանակ:

Նշվում է, որոշման նախագիծը ներառվել է ԱՊԼ-ի անդամ-երկրների արտաքին գործերի նախարարների ժողովի օրակարգում: Թուրքական աղբյուրը որևէ տեղեկություն չի հայտնում գրասենյակների փակման դրդապատճառների վերաբերյալ:

Նշենք, որ Արաբական պետությունների լիգա միջազգային կազմակերպություն է, որը միավորում է 20-ից ավել արաբական երկրներ և դրանց բարեկամ պետություններ։ Արաբական երկրների լիգան ստեղծվել է 1945 թվականի մարտի 22-ին, Կահիրեում տեղի ունեցած կոնֆերանսի ժամանակ, որին մասնակցում էին Եգիպտոսը, Սիրիան,Լիբանանը, Անդրհորդանանը, Իրաքը, Սաուդյան Արաբիան և Յեմենը։

Աղբյուր` Ermenihaber.am