Նոր ահաբեկչական պայթյուն Անկարայում. կա 27 զոհ, 75 վիրավոր

Տարածաշրջան20:00, 12 Մարտ 2016

Նոր ահաբեկչական պայթյուն Անկարայում. կա 27 զոհ, 75 վիրավոր

Թուրքիայի մայրաքաղաք Անկարայի Քըզըլայ շրջանում այսօր երեկոյան որոտացել է հերթական ահաբեկչական պայթյունը: Պաշտոնական տվյալների համաձայն՝ Աթաթուրքի զբոսայգու մոտ տեղի ունեցած պայթյունի հետևանքով զոհվել է 27, վիրավորվել 75 քաղաքացի: Լրատվամիջոցները հայտնում են, որ զոհերի թիվը կարող է աճել:

Թուրքական «Milliyet» թերթի կայքը տեղեկացնում է, որ հեռուստառադիոընկերության բարձրագույն խորհուրդը արգելք է դրել թեմայի լուսաբանման վրա:

Ականատեսների վկայությամբ՝ մի ավտոմեքենա է մոտեցել քաղաքապետարանի ավտոբուսին ու այդ ժամանակ պայթել: Նախնական վարկածով՝ ահաբեկիչները պայթեցրել են ռումբով բեռնված ավտոմեքենա:

Անկարայում հայտարարված է տագնապ. ոստիկանական ուժերը կանխարգելիչ միջոցառումներ են իրականացնում հնարավոր 2-րդ պայթյունը կանխելու համար:

Հիշեցնենք, որ նախորդ ահաբեկչական պայթյունը տեղի էր ունեցել փետրվարի 17-ին, ինչի հետևանքով սպանվել էր 28 մարդ, որոնցից 27-ը՝ զինվորականներ:

Աղբյուր` Ermenihaber.am