Թուրք-քրդական զինված նոր բախումներ, կան զոհեր

Տարածաշրջան13:23, 14 Մարտ 2016

Թուրք-քրդական զինված նոր բախումներ, կան զոհեր

Թուրքիայի տարածքում չեն դադարում և նոր թափով են շարունակվում զինված բախումները քուրդ գրոհայինների հետ: Թուրք ուժայինները քրդաբնակ Մարդին և սահմանամերձ Հաքքարի նահանգներում «Քուրդիստանի բանվորական կուսակցության» (ՔԲԿ-PKK) զինյալների դեմ ուղղված օպերացիաներ են իրականացնում:

Թուրքական «zaman» պարբերականը, հղում անելով Թուրքիայի զինված ուժերի (ԶՈՒ) գլխավոր շտաբին, տեղեկացնում է, որ նշյալ գործողությունների ժամանակ Նուսայբին շրջանում սպանվել է 2, իսկ Յուքսեքովա շրջանում 15 քուրդ գրոհային: Իսկ 7 հոգի գերեվարվել է:

Բացի այդ ռազմագործողություներ են իրականացվել Թուրքիայի հարավարևելյան Շըրնաք նահանգի Ջիզրե շրջանում: Արդյունքում թուրքական ուժերի կողմից հայտնաբերվել և առգրավվել է 6 հատ «Կալաշնիկով» տեսակի ինքնաձիգ, 496 փամփուշտ, 18 ականանետ և 8 ինքնաշեն պայթուցիկ:

Նշենք նաև, որ մայրաքաղաք Անկարայում մարտի 13-ի երեկոյան տեղի ունեցած ահաբեկչությունից հետո Թուրքիայի օդուժի կործանիչները ռմբակոծել հյուսիսային Իրաքի քրդական հենակետերը:

Աղբյուր` Ermenihaber.am