Թուրքիան 2016թ. բյուջեով կավելացնի կրթության և պաշտպանության ոլորտի հատկացումները

Տնտեսական18:17, 16 Մարտ 2016

Թուրքիան 2016թ. բյուջեով կավելացնի կրթության և պաշտպանության ոլորտի հատկացումները

Թուրքիայի խորհրդարանը հաստատել է 2016 թվականի բյուջեն: Թուրքական «Memurlar» լրատվական կայքը հայտնում է, որ բյուջեով կրկին մեծ տեղ է հատկացվել պաշտպանության և անվտանգության ոլորտներին:

Նախորդ տարի պաշտպանության և անվտանգության ոլորտներին պետբյուջեից հատկացված միջոցները կազմել էին ազգային եկամտի 3.1 տոկոսը: Ընդհանուր առմամբ հատկացվել է 61.7 մլրդ լիրա (մոտ 21 միլիարդ 113 միլիոն ԱՄՆ դոլար), որից 22.8 միլիարդը՝ պաշտպանությանը: Իսկ 38.8 միլիարդը տրամադրվել է հասարակական կարգի ապահովման և անվտանգության այլ ծառայությունների համար: Ընթացիկ տարվա բյուջեով ևս նախատեսվում է այս ոլորտին հատկացնել ազգային եկամտի 3.1 տոկոսը: Ըստ այդմ՝ պաշտպանության ոլորտին բաժին կհասնի 27.2 միլարդ լիրա, իսկ հասարակական կարգի ապահովմանը և անվտանգության այլ ծառյությունների համար կհատկացվի 42.2 միլիարդ: Ընդհանուր գումարը կկազմի 69.4 միլիարդ լիրա (23 միլիարդ 742 միլիոն դոլար):

Կրթության ոլորտին հատկացվող գումարն ավելացել է: Եթե 2006-ին կրթությանն ուղղվել է 22.2 միլիարդ լիրա, իսկ 2015-ին 86.8 միլիարդ (29 միլիարդ 682 միլիոն դոլար), ապա 2016 թվականին այդ գումարը կկազմի 101.8 միլիարդ լիրա (34 միլիարդ 794 միլիոն դոլար): Սա կազմում է ազգային եկամտի 4.61 տոկոսը:

Աղբյուր` Ermenihaber.am