WSJ .«2016թ. ամռան համար թուրքական տուրերի ամրագրումները նվազել են 40%-ով»

Տնտեսական11:50, 21 Մարտ 2016

WSJ .«2016թ. ամռան համար թուրքական տուրերի ամրագրումները նվազել են 40%-ով»

Ամերիկյան «Wall Street Journal» թերթը անդրադարձել է Թուրքիայի զբոսաշրջության ոլորտի ընթացիկ վիճակին: Պարբերականի վկայությամբ՝ 2016թ. ամառային հանգստյան սեզոնի համար թուրքական տուրերի ամրագրումներում 40 տոկոս անկում է գրանցվել: Թուրքիայում կրկնակի անգամ նվազել է հյուրանոցների համալրվածությունը, իսկ բազմաթիվ հյուրանոցներ վաճառքի են հանվել:

«Թուրքիայի եկամուտները զբոսաշրջության ոլորտում 2001-2014թթ. երեք անգամ ավելացել էր՝ հասնելով 34.4 մլրդ դոլարի ռեկորդային սահմանին: Սակայն 2015թ. նոյեմբերի 24-ին թուրքական F-16 կործանիչի կողմից ռուսական Su -24 ինքնաթիռի խոցումից հետո զբոսաշրջության ոլորտի ցուցանիշները սկսեցին անկում ապրել:

Ռուսաստանի նախագահ Վլադիմիր Պուտինը Թուրքիայի դեմ հատուկ տնտեսական սահմանափակումներ գործի դրեց: Իսկ տարբեր քաղաքներում տեղի ունեցող մի շարք ահաբեկչական գործողությունները խարխլեցին Թուրքիայի համբավը», - գրում է «Wall Street Journal»:

Ամերիկյան թերթի հրապարակած պաշտոնական տվյալների համաձայն՝ զբոսաշրջության ոլորտն ապահովում է Թուրքիայի համախառն ներքին արդյունքի ավելի քան 4 տոկոսը: Բացի այդ, այս ոլորտում աշխատում է շուրջ 1 մլն մարդ և այդ ցուցանիշը կազմում է երկրի ընդհանուր աշխատուժի 7 տոկոսը:

Աղբյուր` Ermenihaber.am