Իրանը Թուրքիային առաջարկել է ավտոմեքենաների համատեղ արտադրություն սկսել

Տնտեսական07:16, 03 Մայիս 2016

Իրանը Թուրքիային առաջարկել է ավտոմեքենաների համատեղ արտադրություն սկսել

Նախօրեին 70 հոգանոց պատվիրակությամբ Իրան մեկնած Ստամբուլի առևտրային պալատի նախագահ Էրդալ Բահչըվանը հանդիպում է ունեցել Իրանի արդյունաբերության և առևտրի նախարար Մոհամմադ Ռեզա Նեմաթզադեհի հետ:

Ըստ թուրքական «Milliyet» թերթի կայքի` հանդիպման ժամանակ իրանցի նախարարը, նշելով, որ ցանկանում են խորացնել 2 երկրների միջև համագործակցությունը, առաջարկել է ավտոմեքենաների համատեղ արտադրություն սկսել:

«Երկու երկրների գործարարների համատեղ ներդրումներ անելու համար Իրանում 4 նոր արդյունաբերական գոտի ենք հիմնում: Կարող ենք 50-50 մասնաբաժնով նոր ավտոմեքենաներ նախագծել և արտահանել աշխարհի տարբեր երկրներ»,- նկատել է Նեմաթզադեհը:

Ստամբուլի առևտրային պալատի նախագահն էլ հայտնել է, որ իրանական շուկայի ուսումնասիրության համար շուտով իրենց կառույցում հանձնաժողով կձևավորվի:

Բահչըվանը նշել է, որ առաջիկա համագործակցության համար ամենակարևորներից մեկը կլինի Թուրքիայի ֆինանսական սեկտորը: Ըստ նրա՝ մաքսային բարձր վճարների, փոխադրման միջոցների անբավարարության և բնական գազի բարձր սակագների հարցի լուծման պարագայում 2 երկրների միջև առևտրաշրջանառությունը հնարավոր կլինի հասցնել 100 մլրդ դոլարի: Այցի ընթացքում թուրքական ընկերությունները բանակցություններ են վարել շուրջ 202 իրանական ընկերությունների հետ:

Աղբյուր` Ermenihaber.am