Քուրդ բռնցքամարտիկը սպառնալիքներ է ստանում թուրքական «գորշ գայլերից»

Մարզական07:09, 24 Մայիս 2016

Քուրդ բռնցքամարտիկը սպառնալիքներ է ստանում թուրքական «գորշ գայլերից»

Միջին քաշային կարգում հանդես եկող քուրդ բռնցքամարտիկ Իսմայիլ Օզենը մայիսի 7-ին Գերմանիայի Համբուրգ քաղաքում միջմայրցամաքային առաջնությունում հերթական հաղթանակ է տարել մրցակցի նկատմամբ:

Քրդական «Rudaw» լրատվական գործակալության հարցազրույց տված բռնցքամարտիկն ասել է. «Տարիներ շարունակ ես ռինգ եմ դուրս գալիս Քուրդիստանի անունից: Այդպես էլ շարունակելու եմ: Գերմանական մեդիայում ճանաչված եմ որպես քուրդ մարզիկ»:

Թուրքիայի Դերսիմ (Թունջելի) քաղաքում ծնված Օզենը պատմել է, որ բազմաթիվ սպառնալիքներ էս ստանում թուրքական ծայրահեղական ուժերից՝ գորշ գայլերից, ինչպես նաև «Իսլամական պետություն» ահաբեկչական կազմակերպությունից:

«Ինձ թիրախավորում են հատկապես Էրդողանին մոտ կանգնած լրատվամիջոցները»,- նշել է քուրդ բռնցքամարտիկը՝ չմանրամասնելով, թե ինչ սպառնալիքների մասին է խոսքը:

Անդրադառնալով Թուրքիայի հարավարևելյան մասում ընթացող բախումներին՝ Օզենը շեշտել է, որ այժմ քրդերի համար դժվար ժամանակներ են: Կոչ է արել քրդերին լինել ավելի համախմբված, քանի որ դա միակ ելքն է ստեղծված իրավիճակից դուրս գալու համար: Նա նշել է, որ իրենք հնարավորինս պետք է օգնեն միմյանց:

Աղբյուր` Ermenihaber.am